洪禮賢講馬：大隊長衝得起

纯情小彩迷

　　韋達今期騎足咁多場，隔夜騎師王賠率得十幾蚊，賠率同部分有飛嘅騎師有一大段距離，開得咁嘅盤，經已帶出佢今日手馬有幾惹飛，且看能否進一步拉近同阿寶嘅頭馬差距啦﹗﹖

重心場次

第10場  第三班（85-60分） 1400米

　　超群如意之前能夠同升到96分嘅「安御」埋身肉搏，目前分數連八字頭都未到，有排都未到阻力區﹔今次跑三班Ａ組，負磅壓番低好跑好多，只要韋達處理上不似阿民上賽咁論盡，不勝有位。

    　「川滙主帥」過去在此班跑７場最差得殿軍（2冠2亞2季），班霸級水平選手是也，柏寶唔放手倒正面，只要唔似剛仗過分蝕章的走位，殺傷力好大。「明駿之寶」在嚴重偏短的谷草1000米，跑得唔好都得第四名，追勢嚇一跳，即換人、轉場及加程，有晒下台階，未必縮槓。「戰士」上賽成條直路「聞屁」，跑線轉來轉去都係塞塞哋，發揮幾曳，一降班換德叔，但轉到表面冇根據的此程，唔似郁手格局，但上季同程受阻也輸近，性能唔水皮，加上賠率勁高水，抵博。

    　「鎗臣」如因應今場步速會快，畀佢守到好位，直路有機會走甩，情況一如季初贏馬一役，咪睇小。「千江映月」上1400米冇問題，賽績亦反映夠班有餘，只擔心騎練好耐冇佳作了（對上1匹合作馬上名在08年1月中）。「特好」又係初跑此程，雖則近仗在短途係落腳慢了，但氣量要估。

第1場  第四班（60-40分）1000米

　　欖球樂園上賽確認進度持續，回到直路賽有好冇壞，如非十四檔被塞死，三甲穩入。「領航人」耐冇跑，但試閘唔躁而沿途夠韌，復出揀此程唔似為開氣。「原小子」上賽全程大外叠鬥燒，輸咗當冇跑過罷了，落班回到直路賽兼用柏寶（季內騎練同程入Ｑ率55％），部署正面。此外，長期都話「領航動力」跑四班賽，在速度微超，邊線馬。「飛魚駿王」、「活力至寶」及「八飛」，前駒已露過一手，「活力至寶」加配件或幫到手，後駒飛數隔夜離奇暴跌，小注一試無妨。

第2場  第五班（40-10分）1600米　

　　大隊長短途衝唔起係正常，輸唔遠已合格，今場回到中程，檔位形勢比前仗理想，有贏面。「天之驕子」剛仗有冇塞過都好，唔見得會贏到，落班係有着數卻重磅，並非想像般超級，呢次十四檔更有點危，拖腳算嘞。

    「皇仁俊駒」三檔令早段易泊位，賽事形勢妙絕，雖然有一排冇出，準備流程冇大問題，休出儲夠體力可能更堅。「金威神童」及「智勇非凡」同場或出現互燒局面。「利之寶」上賽好位而衝落唔多，略失望。「開心財星」季內已兩Ｗ，級數掃晒，回一回或又返嚟，始終今場或利追。

第3場  第三班（80-60分）1200米

　　盈彩繽紛連續兩W，贏來完全唔同班，尤其上場新升班及轉程，一樣可以造出1.09.31（季內十幾場班內1200米最快時間），加12分濕濕碎，十二檔影響就算大亦未驚過。「馬之王」缺點係唔鬥得，優點係演出穩。

    　「金玉滿堂」1400米唔要命咁放，換來大敗賽績，落班亦令人覺得好似冇優越感啊，但其實上季未贏之前亦有雷同安排，唔排除呢次又係新瓶舊酒。「威海歡騰」1400米唔到咪落番此程，既然前仗能入Ｑ，今場一樣有機會。「雄風」及「好勇駿」一對有班嘅馬，臨場如飛數有郁動便要小心。

第4場  第四班（60-40分）1200米

　　驍騎無敵已取２Ｗ１Ｑ，分數唔係冇壓力，不過撞啱一場充斥班內ＢＢ的有利環境，依然夠照。「清新空氣」初出重飛失手，末段唔夠貫注力，可能初出未夠「方」爆唔起，開完氣加程，手法進取。

    　「麗晶之星」除了拉勻算準及檔好，其實冇咩賣點。「多樂趣」嚴格來說上場唔算追得勁，或加程更好。「辣得喜」工夫加壓，成效則非大進，不過加配件如令牠進一步投入賽事，有權變身。「蜚聲」試閘有兩腳，幾好速度感，但外檔有風險，限於拖腳。「紅冠子」情況與前駒差唔多。

第5場  第四班（65-40分）1400米

　　高智慧及「又贏晒」在班次和路程性能上秤先，尤其今場前中段未必快，可能食正形勢。

    　「松林之星」跑到夠晒先重返此程，勝任成數幾高，不過恐追唔切。「雙辣」上場直路就算冇阻礙亦未必贏到，不過明顯加頭罩後，臨場乖好多，以目前已收斂的情緒嘗試增程係好事。「新薪」之前此程一試效果曳，但今場檔好可能係兩回事。「玩具神話」剛仗過於進取的跑法唔啱，換人及轉場，隨時有變數。

第6場  第四班（60-40分）1400米
金巴利來前一場守好位可拍住「皆大歡喜」過終點，大致上已仄準最佳跑法，經過上場連練者也覺得跑錯的賽事（所以名次唔使理會﹗），呢次終等到加程，有埋三檔幫手，估計能力可翻一翻。「傑出君子」二檔夾跑法，正路配腳。
    「旅遊大亨」冇痰根本係三班都有得揮嘅馬，但會唔會又痰上頸真係要博。「松風」基本上除了前仗無故漏閘之外，今季場場喺度，由於跑法煞食，總要尊重。「私家路」比較近兩仗的沿途走位，便知點解會退步，今場五檔冇乜可能又走外叠啩﹗﹖「信賴」和「招積仔」買Ｆ或Ｔ可拖一注。

第7場  本地三級賽 1800米

　　牛精財星跑得論盡才令上賽冇Ｐ，卻反映狀態又返嚟，今場孭住110磅，威力大得多。「好先生」跑咁耐係得戴圖理跑得唔好嗰場冇表現，唔揀係違反數據。

    　「怡勝」回到次一級的組別，不難發揮作用。「喜聚寶」大閘衝落唔多，不過有點卡士，尚有位望。「醉味」進步緊，就算大幅加程也難睇小。「鐵拳」如掌握晒步速，有權出冷。

第8場  第一班（115-90分）1200米

　　紀利威龍近績夠準，此程又係強項中之強項﹔「點心」跑得番在呢類場合一定唔驚﹔「火箭動力」贏級數而路程略短。

    　「正本仁心」六檔未必搵唔到遮擋，恃輕磅有偷襲本錢。「好友福」縮回此程冇不可，但十四檔影響大。「電光能源」形勢與上賽大不同。

第9場  第三班（80-60分）1800米

　　馬主精英當弗，會不斷突破評分高位，轉來此程亦睇唔到有咩問題。「印度光輝」劣勢下可反勝，剛仗水準要高度重視。

    　「正歡騰」一再遇到難度而跑得好，再追。「我愛您」對手仍強，不易突破，爭腳居多。「同心同德」前仗幾乎贏到，上場可能體力未回籠，回一回或再現威力。「銀影激光」落入阿郭手上能有正面幫助。

    　「紅跑車」上仗爆一段唔差，班分俱有利嘅馬，換騎練合作愉快嘅韋達，有權跑得好。