鹿角強勢破風

猪拉多纳

衞冕私家盃特別醒神

日本聯賽盃分組賽今日開波，A組焦點之戰，上屆冠軍鹿島鹿角主場迎戰甲府風林！鹿角係呢項賽事史上捧盃次數最多嘅球隊，9次打入決賽，6次奪冠，其中近5屆更3度獲得冠軍，非常旺場。對手甲府風林喺聯賽都踢唔掂，無力兼顧盃賽，難阻鹿角響頭炮，Mic少直取鹿島鹿角2.12倍讓球主勝。

（周三晚6時開賽）

鹿島鹿角上屆因為有份角逐亞冠盃，可於日聯盃直入8強，結果5戰取得4勝1和，包括決賽以3比0大勝大阪飛腳，再次證明日聯盃係佢哋嘅「私家盃」。今季日職開鑼後，鹿角仍然保持強勢，4戰取得3勝1負，相信轉戰盃賽一樣難唔到佢哋。前鋒金崎夢生雖要為日本隊征戰，但另一前鋒鈴木優磨把握力亦不俗，今場有望掛帥繼續爭取士哥。

甲府風林近年都係日職護級分子，今季聯賽4戰亦僅獲1勝1和2負，上仗仲慘吞川崎前鋒4蛋，認真洩氣。事實上，風林只屬於中小型班，以球員質素實在無力兼顧聯賽及盃賽雙線發展。上屆日聯盃6場分組賽，風林最終以2和4負包尾出局，明顯呢項盃賽唔係佢哋杯茶，今屆首仗即遇上衞冕嘅鹿島鹿角，隨時大敗絕不出奇。
前鋒水手大駁火

同時間，B組川崎前鋒主場對橫濱水手，川崎前鋒火力強勁，近3仗聯賽合共攻入11球，亦失咗6球，名副其實有前冇後。橫濱水手聯賽兩連勝，踢出士氣，無懼同主隊駁火，即使入球大細中位數提升至2.5/3球，都照揀入球大。