波蘭大盤有數「維」羅拔仔近8戰轟11粒

猪拉多纳

波蘭近年進步神速，佢哋喺今屆歐國盃外圍賽D組，僅以1分之差落後世盃冠軍德國，以次名殺入決賽周，陣中王牌射手羅拔利雲度夫斯基亦成功孭起國家隊鋒線。今晚呢支東歐球隊主場同塞爾維亞拍跳，2.08倍入球大值得支持。

（TVB301周四凌晨3:45直播）

講起波蘭，大家梗係會諗起羅拔利雲度夫斯基，呢位前鋒射術精湛，唔止喺球會交到貨，返到國家隊一樣咁醒，近8場比賽合共轟入11球。難怪波蘭喺外圍賽嘅入球數字比球星如雲嘅德國仲要多成9球，10戰斬獲33球。更令捧場客放心嘅係，呢支東歐球隊狀態大勇，近5戰取得4勝1和不敗佳績，夾埋狂轟19球不特止，而且全部都至少射入對手2粒，最終全部開晒入球大，火力非常有保證。
塞爾維亞唔慣吞蛋

對手塞爾維亞正值青黃不接期，近4場賽事輸3仗，好在班波仲有一定攻力。3場敗仗面對法國、葡萄牙同捷克呢啲名牌球隊，都叫做有辦法攻破對手大門，未致於要吞蛋而回。呢勻佢哋作客出戰連續6仗都有失波嘅波蘭，應該唔難取得入球嘅。既然雙方各有板斧士哥，今仗友賽寓賽於操，入球大抵玩。