三獅兵做大騷

猪拉多纳

另一場熱身賽，英格蘭主場鬥荷蘭。「三獅兵團」上仗3比2反勝世盃冠軍兼死敵德國吐氣揚眉，不過領隊鶴臣賽前講明今仗會畀機會上場冇份落場嘅球員，預計正選陣容會面目全非，荷蘭踢法向來攻強守弱，捧大盤最啱數。

（周三凌晨3時開賽）
畢蘭特收咧英軍鬧龍門荒

英格蘭上仗反勝德國，踢出近年代表作，熱刺4子同射入國家隊首個士哥嘅占美華迪賽後被捧上天，一班舊人好似史杜列治、禾確特及占士米拿等有得落場自然要搏，另外首次入選嘅李斯特城中場真禾特都會打正選。最慘喺門將畢蘭特上仗傷出，證實足踝骨折最少抖3個月，除要提早收咧，亦好大機會錯過今夏決賽周，英軍後防更形不穩。

荷蘭冇份出戰歐國盃決賽周，現階段屬重組兼為9月開打嘅2018世盃外練兵，球隊近6仗國際賽場場有失波，包括上仗熱身賽主場輸畀法國2比3，今仗仲要冇埋喺操練時被隊友撞傷鼻樑而缺陣嘅正選門將施利臣，防線同樣令人擔心，好彩曼聯翼鋒迪比返到國家隊翻生，上仗交出2個助攻，加上荷蘭近6次喺國際賽對英軍未輸過，今仗以攻代守未必冇得打，捧大盤最穩陣。