馮諾嘉手記：定快四捷在望

纯情小彩迷

　　聽晚沙田八場全泥宴，第二場四班1200米，小妹用咗「風陵渡」做膽，近兩場落番四班上陣，即刻展現出戰鬥力，前仗響同程入Q，只係輸畀「時時攞彩」四分三馬位；上場再跑此程，亦只不過輸畀超班嘅「科研精英」得第二，證明近態大勇，今場抽番個一檔起步，係時候贏番場。

　　配腳方面，「奄尖大少」先後跑過谷草、田草同泥地，但都係以泥地1200米表現最好，今次排響四檔起步，形勢比起上仗排十一檔有利得多，估計會有唔同演出。「實業輝煌」上仗落四班即刻用柏寶操刀，但出閘後居然留後跑，搞到賽後柏寶都要向競賽小組解畫，今次改楊明綸話唔定變身。

　　「馬皇帝」初出已經報跑泥地1200米，證明幕後都睇好佢嘅泥地性能，結果跑第四表現唔曳，上場跑田草1400米亦輸唔遠，今次跑番泥地賽要吼實。「寰采商人」同程累積三冠兩亞兩季，絕對係路程專家，今場對手弱可以拖埋。

　　第五場三班1200米，「一定快」最近響此程打叠贏咗三場，每次都起碼贏對手一個馬位，肯定係新一代泥地短途專家，上仗贏馬後加10分，今次仍然繼續留響三班上陣，唔會有任何阻力，四連捷在望。

　　對手方面，「金獅駿將」上仗一度難以穩定走勢兼搶口，跑唔出水準情有可原，今場回配韋達應有唔同發揮。「歡樂出擊」來港後未交代，一定心急謀表現，可以吼實。「全德勝」跑番泥地賽，有機會由蟲變龍。「勁飛馳」連仗跑近，四連環要拖。