洪禮賢 講馬：威騰駒搵啱騎師

纯情小彩迷

　　原定在月尾先至客串期約滿嘅巫斯義，因跑罷夜賽被罰停賽兩日，換句話說，今期就係佢最後一戰，究竟呢次之後，佢真係全身而退（之後會先返歐洲跑一陣），下次再嚟香港會以練者身分，還是唔嫁又嫁，下季又嚟騎幾個月，真係要睇佢有咩機遇，不過，當日的法國旋風，到今日接近五十嘅佢，陣上的確唔係人咁品，只要手上唔係冇馬，又或「外遊」之時，畀心機跑一場馬，就算冇真金白銀買落去，也是賞心悅目，單睇「至勇威龍」當日點贏打吡預賽，發力點拿捏得有幾準，已經係殿堂級高手的功架。

近兩仗有藉口原諒

　　不論今期是否佢在港最後一役，都係今季拉士一期吧，出馬唔係多，6駒而已，有餐士嘅馬唔係冇，譬如第八場「威騰駒」已經係其中一匹。冇錯，隻馬跑落好似係咁多嘞，講嚟講去都係得一場（總場次256）作為實力參考指標，當然嗰場的水準又真係幾得，輸少少畀「披星戴月」，而可衝贏「鎗臣」，點計亦冇可能評分在七字頭冇運行囉。之後兩場再跑1600米只係得第五名，真正係咩原因令隻馬進度徘徊，撇開狀態及體能上，其實唔係好咬得死仲有甚麼因素，之但係，前仗在閘前發現條脷損咗，而上場則明顯輸在留放吧，未待入正直路，衛先生慌死會被box死咁款，一早發力，令拉士貫注力頂唔到尾。

　　事實上，睇番入Q一役，唔知好彩定唔好彩，塞到最後300米至搵到位上，就係咁先至發揮到其威力﹔今仗用得阿巫，主觀意願佢會拿捏得準，加上同場唔多快馬，對於略帶均速守好位跑法嘅佢真係啱晒，今次應是開齋良機。