馮諾嘉手記：活威小子逢五進一

纯情小彩迷

　　禮拜三晚沙田馬場全泥宴，早有預感會連場爆冷，皆因上次全泥宴大熱只得一匹「永利多」跑第二，而之前同類賽事大熱門嘅演出都係麻麻。話說當晚有位朋友邀請小妹一齊入場睇馬，心諗全泥賽事都唔係好想玩，現場睇馬氣氛又唔夠田草日馬咁濃厚，入場冇其他嘢好做，隨時焗住場場賭，但盛情難卻，就當食餐飯，點知原來呢位朋友無訂枱，終於都去唔成，結果當晚好多心水馬連場跑梗頸四，如果入咗場，真係激都激餐死。

　　練馬師蔡約翰暫時有四十三場頭馬，雖然暫時排喺練馬師龍虎榜首位，但係同第二位嘅告東尼、第三位方嘉柏只係相差一、兩場，要重登練馬師冠軍寶座，一定要趁住領先，贏多幾場頭馬拋離對手。睇番嚟緊周日沙田十場賽事， 蔡約翰馬房嘅餐士馬都唔少，當中頭場五班1800米嘅「活威小子」亦幾有贏面，呢匹馬曾經贏過五班田草1800米，本身實力唔係超班，喺五班叫做啱啱好，睇番佢嘅往績就知道，至今三W都喺五班攞到。近四仗四班作賽最叻跑五，減夠分後今場又返番五班跑，隨即強配韋達，今次對手冇咁強，亦唔係咁多識跑1800嘅馬，馬房戰意鮮明，隨時又變番阿一。

進勝福星對手弱

　　至於另一心水初選，同樣係蔡廐馬，第三場四班1200米，追捧「進勝福星」，呢匹馬上場初出跑谷草1000米，由於賽前試閘走勢吸引，幾乎一放到底，大家當然期待佢一出即贏，結果獨贏賠率亦熱到只得2.6倍，可能幕後人亦信心十足，但對一匹初出馬嚟講，咁嘅賠率真係熱得過分，結果入直路時走勢唔多順，仲有啲稚嫩，根本發揮唔出應有水準，只能夠跑第六。熱過身之後，今場轉嚟沙田跑1200米，對手近仗多數表現麻麻，好多狀態未到位，只要「進勝福星」交出之前試閘所見嘅水準，應有機會開齋。