太極虎半和耍家

猪拉多纳

狂牛避重就輕勒住踢

今晚最有睇頭嘅國際熱身賽，梗係西班牙於奧地利中立場對住「太極虎」南韓。「狂牛」不嬲唔重視熱身賽，尤其係約戰亞洲球隊唔多認真，常因輕敵搞到初段入局慢，近5次出戰亞洲球隊，4度喺上半場未分勝負，加上歐國盃決賽周快將開鑼，衞冕嘅西班牙唔想臨開打前增添傷兵，今仗隨時避重就輕hea踢，半場和值得捧場。

（now 632周三晚10時30分直播）
西班牙5遇亞洲波4半和

近兩屆歐國盃都封王嘅西班牙，實力梗係贏南韓幾條街，正因為呢個原因，心態上難免睇小對手，雖然近5次與亞洲球隊「拍跳」錄得全勝，但有3次只係險勝1粒，可見佢哋唔多盡力，當中更有4次於上半場同對手握手言和，包括2次喺中立場出戰南韓，睇得出「狂牛」喺比賽初段特別慢熱。而且歐國盃決賽周快將開鑼，西班牙眾將都唔想於無關痛癢嘅熱身賽無喇喇受傷，搞到冇得踢歐國盃，尤其係必定入選嘅恩尼斯達、大衞施華、碧基等主力，今仗勒住嚟踢亦可理解。
南韓9連勝信心爆晒棚

另一邊廂，南韓今次召入奇誠庸、池東沅、洪正好等外流球星，實力絕對唔弱，連世盃外在內近9仗贏晒，信心爆晒棚，面對近4仗「拍跳」得2勝2和、戰意成疑嘅西班牙，「太極虎」至少喺上半場頂住唔輸，一於捧半場和。