馮諾嘉手記：君子一言1600實啱

纯情小彩迷

　　禮拜日沙田馬場十場賽事，重頭戲當然係第八場主席錦標，呢場本地二級賽跑1600米，為求奪盃，唔少馬房都精英盡出，好似大摩同蔡約翰都分別派三駒上陣，實行馬海戰術。

　　噚日排位表一出，睇到騎師配搭都幾有趣，蔡廐三駒，當然首選「勇敢小子」，畀番韋達執韁相當正路，之前嘅打吡大賽，韋達睇好方嘉柏馬房匹「極品絲綢」，因而放棄之前六戰不敗嘅「勇敢小子」，其實兩匹馬佢今季都一直摸到實，實力如何當然好清楚，結果「極品絲綢」順利贏咗打吡，證明佢眼光獨到，今場韋達攞番「勇敢小子」嚟騎，係時候再幫蔡約翰建功。

　　而大摩三駒之中，當然係「閒話一句」秤先，但係睇配搭幾特別，呢匹馬多數由白德民經手，今次就畀咗勞愛德騎，上場跑香港金盃，仲喺白德民胯下輕鬆取勝，但今次無啦啦改用從未跑過呢隻馬嘅勞愛德，白德民則騎「步步穩」，實行交換坐騎，箇中因由相信只有佢哋先知嘞﹗

　　對於大摩嚟講，呢場出三駒總有正副之分，「閒話一句」呢次新配搭，真係增加咗投注者嘅疑慮，小妹一於好小理，何況「勇敢小子」同「閒話一句」近態咁好，理應都跑入前列，配腳實要拖。至於馬膽，小妹反而睇好「君子一言」，呢匹馬喺香港三戰，兩勝田草1400米，上場初次挑戰本地一級賽之餘，仲要突然增程跑2000米，落敗好正常，今場回師1600米，睇佢跑1400米能夠輕鬆贏馬，跑多二百絕對啱腳法。配腳除咗「勇敢小子」同「閒話一句」，又點少得「締造美麗」，今季連場有好表現，上兩場跑1800、2000米或者長咗啲，但今仗返番贏馬路程，有唔同睇法。

好利利試準開齋

　　心水馬仲有第二場四班1200米嘅「好利利」，之前跑過兩場1000米都得第二，試準晒重新操磨，增程跑1200米，隨時開齋。