馮諾嘉手記：萬事佳賽績硬淨

魑魅魍魉

　　連續幾日復活節假期，唔少朋友一早已預定出門旅行，如果前後攞多幾日假，更可以去較遠嘅地方。即使唔去旅行，亦有唔少人趁住清明回鄉掃墓。

　　不過，呢個星期天公不做美，天文台預測呢幾日都有雨，而內地天氣亦唔係咁好，對於打算回鄉嘅朋友都有影響。至於嚟緊嘅賽事，由於有驟雨嘅關係，對於場地唔多唔少都有影響，馬迷投注前記得執生。

　　第三場三班1000米，小妹用「萬事佳」做膽，至今三戰同程獲兩冠一亞，前仗壓倒「明燈」入Q，賽績夠晒硬淨，上仗亦已反先番「軍策令」，今仗抽得有利嘅十一檔更容易發揮，再贏無難度。配腳先拖仗愈跑愈近嘅「氣定神閒」，應該差唔多到位。「大有運」熱身後今場應該有唔同表現。「聖迪達」新勝猶勇，計馬都要拖。「金鑽龍華」評分見盡但勝在夠準，作配無妨。

　　第六場三班1400米，最鍾意蘇廐「好心星」，在港四戰獲兩冠兩亞，質素當然唔會曳，上場撞正大超班嘅「安御」，跑第二已經收貨，何況嗰場第三名嘅「滙名燈」再出亦已經贏馬，更證明水準甚高，今場對手唔強，應該可以補中。

　　配腳方面，「千江映月」上場後上追勢吸引，四歲馬踏入大熟黃金期，今次繼續交畀賴維銘操刀，一定搏盡。「蓬萊仙子」季內兩勝兩位都係響1400米取得，上場換馬偉昌操刀表現失準，今場用番贏馬拍檔蔡明紹，可以畀多次機會。「特色咖啡」、「文武精英」上仗均有走勢，可以一併兼顧。