借題發揮：跑完打吡做番自己 主席錦標吼② ⑩

港陌

　　本年度嘅打吡大賽已經曲終人散，但每一季都會見到關於要跑打吡而出現嘅現象，就係爭分跑打吡，又或是勉強掹上長途，結果好多馬因而偏離應走的路，成績不進反退。之但係，有些馬當跑完打吡之後就做番自己，該有的能力便重新展現，像去季「再豐裕」便為最佳例子，上季先在經典一哩賽露過一手，可惜在四歲系列的尾兩關冇乜表現，但當卸下包袱後，卻有本事勝出二級賽主席錦標，證明失意於打吡嘅馬，往後一樣可發亮，只要路程安排妥當。

　　到了今屆主席錦標，一大堆跑過打吡嘅馬在陣，諸如「爆冷」、「閒話一句」、「締造美麗」、「勇敢小子」等等， 坦白講， 雖則有1 1 匹馬跑，部分根本係戥場性質，1600米對嗰啲馬嚟講，都唔係佢哋杯茶，就算評分高而有級數又點，直路未撻得着後勁，人哋已經過晒終點啦！

部署如上屆盟主再豐裕

　　愈諗愈覺「締造美麗」同「勇敢小子」有啲似上屆盟主嘅「再豐裕」，望落都係跑完打吡做番自己，始終之前為要進軍四歲系列賽或爭分關係，部署上點都有影響，出賽時間表肯定冇依家咁自在，選擇路程上亦唔會咁有自由度；講到實力，「阿麗」話晒係經典一哩盟主，級數點秤亦唔會蝕畀同場邊一匹馬，尤其係跑1600米。至於「阿勇」，之前1000至1800米直落贏6W，係到2000米嗰場跑P，顯示到路程性能真係突破唔到本身嘅框架，呢次縮番落呢程，梗係好跑得多啦，總之呢對四歲精英，俱為爭盃主角。

亨利