馮諾嘉手記：安御勢頭勁

港陌

　　今日沙田十場賽事，除咗第八場主席錦標之外，第七場西洋會盃亦有睇頭，呢場二班1800米雖然只得九匹馬跑，但方東兩廐加埋已佔咗五匹馬，睇嚟都係志在必得。方嘉柏兩駒當然以「勇者無敵」勝算較大，上場同程喺巫斯義胯下跑第二，只係僅僅輸畀「勇敢小子」，敗不足辱，今場回師二班賽，對手中唔少上場都係「勇者無敵」嘅蹄下敗將，如「牛精財星」、「漂亮第一」、「駿綵」同「利好」等，統統都畀佢拋離超過差唔多兩個馬位，今次仲要強配柏寶，有信心贏番一場，做膽。

　　呢場告東尼派成三匹馬上陣，當中最值得睇好嘅當然係評分最高嘅「牛精財星」，季內雖然未嘗一勝，但上場角逐級際賽精英碟面對強敵，只係以四分三馬位之差跑第三，狀態已跑番起，七歲馬搏得就搏，今場對手亦冇上次咁強，配腳要拖。除咗上述兩大倉口，其他馬房嘅馬亦唔可以忽視，好似葉廐嘅「璐悅」，上場縮程跑1400米落敗，今次跑番首本路程田草1800米，呢場冇乜放頭馬，排四檔大可按韁慢放，分分鐘畀佢放到。冷腳可吼上場跑近嘅「利好」。

傳奇快車演出準

　　第九場三班1600米，「傳奇快車」做膽，呢匹馬季內五戰全入前四名，上場初跑1600米，亦只係以頭位之差輸畀「馬主精英」，試準再戰，三歲馬隨時再進一步。配腳先拖上場一放到底嘅「引伸波幅」，其次係上賽表現大進嘅「多贏勁駒」，今次強配柏寶要留神。至於上次後上爆大冷W嘅「戶外名駒」，亦要兼顧。

　　第十場一班1400米，馬膽「安御」，近三仗獲兩冠一亞，狀態正值大勇，上場初跑1600米亦贏馬，上升勢頭勁，回師1400米有力再挑戰「雅雪」。「雅雪」上場初跑本地三級賽亦得第二，當然唔簡單，前仗同「安御」串大熱Q，今場「雅雪」抽二檔預期會放，三檔嘅「安御」大可貼欄跟住佢跑，跑出翻版Q嘅機會相當大。配腳仲有「非我莫屬」同「聖法理」，前駒上場末段追勢凌厲，如果唔係直路連番受阻，未必輸畀「又快又勁」；「聖法理」跑1400亦啱腳法，拖埋。