馬主論戰：鍾意引伸波幅

港陌

　　黃汝安今季暫時贏咗十二W，只差一場頭馬就可以提早上岸，今日安廐有唔少惡馬，話唔定可以達標。最啱心水係第九場「引伸波幅」，呢匹馬今季表現認真犀利，唔經唔覺已經贏咗四場，而且路程性能廣泛，谷草、田草贏過不特止，仲要由1200贏到1800米，今次縮程跑1600米一定可以應付，一於再捧場。

　　另一匹心水係頭場「雙龍出海」，以往跑過兩次直路賽都得第三，證明路合發揮，今次排外檔有啲着數，隨時出頭。

梁廷鏘

引伸波幅蜚聲開齋在望

　　柏寶今日手馬好強，要贏兩、三場馬亦唔係難事，最鍾意第二場「蜚聲」，上場初出跑田草1200米，全程走外叠望空之下都跑第三，輸畀頭馬「清新空氣」唔夠一個馬位，表現夠晒搶鏡，今日繼續配柏寶再跑同程，應該可以開齋贏馬。

　　另一匹要留意嘅柏寶坐騎係第七場「勇者無敵」，上場響田草1800米同「勇敢小子」鬥到頸位分勝負，係高水準賽績，今次再跑同程對手唔算強，吼準西洋會盃先嚟報名，肯定志不在小，必須重視。

張敬山

爆冷級數秤先

　　今日重頭戲第八場主席錦標，大摩派出三駒上陣，睇嚟志在必得，不妨從中揀選捧場對象。計牌面當然「閒話一句」可以睇高一線，話晒上仗贏香港金盃一役表現相當精采，但今次卻突然交畀勞愛德操刀，人馬首度合作，唔知發揮成點。

　　博分頭不如吼廐侶「爆冷」，計卡士肯定係全場數一數二，雖然今季幾仗表現麻麻，但其實每場都輸唔遠，戰鬥力應該未退化，用向來同大摩合作愉快嘅馬偉昌操刀，小心畀佢殺個措手不及。

任達華