馮諾嘉手記：捧明燈金德寶單Q

魑魅魍魉

　　早幾日巧遇一位姚廐員工，閒談中講起「蓮華生輝」，這匹短途馬王因為絞腸痧而未能遠征日本高松宮盃，唔少馬迷都擔心，恐怕佢嘅競賽生涯會就咁結束。但原來這次意外總算不幸中之大幸，當日牠已經登機，幸好陪同牠過日本嘅員工發現馬匹有點異樣，於飛機仍未起飛時決定回程，否則於飛機上絞腸痧，要等到落機才可接受治療，真係隨時一命嗚呼。

　　過往有些絞腸痧馬匹要開刀，切去部分有問題嘅大腸，因而康復時間會較慢，幸好「蓮華生輝」無須切掉大腸，創傷亦較少，至於能否回復昔日勇態言之尚早，但至少知道目前健康良好。

　　周末十場賽事，第五場四班1400米，用「電子金麟」做膽，至今跑了三仗，上場已經獲亞，走勢大有進步，今場雖然又係抽得外檔，但後上馬影響較少可作膽，配腳「旅遊大亨」同「神州八號」都係新勝猶勇馬，拖多一匹上場獲亞嘅「神勇將軍」，四連環揀多一匹「中環英雄」，上場第二次出賽已經獲季，只負半個馬位。

　　第七場一班1000米，用「明燈」做膽，季初熱身一仗之後，近四仗獲三冠一季，近三仗贏馬都相當輕鬆，上仗同程更大勝而回，證明超晒班，今回上一班角逐，有信心可取得四連捷。配腳有「金德寶」，上場增程1200米僅敗，但跑1000米則大勝，回師贏馬路程，配腳首選。「極奇妙」抽得十二檔貼欄好跑。

　　「紀利威龍」季內贏過直路賽紫荊短途錦標，實力絕不遜色。四連環揀多匹負輕磅嘅「牛精金星」。