狐狸PSG大駁火

猪拉多纳

國冠盃歐美站聽朝有法甲冠軍巴黎聖日耳門惡鬥英超冠軍李斯特城，喺洛杉磯上演，聖日耳門季前熱身賽火力十足，不過防線就有唔少漏洞，對住擅踢快速反擊嘅李斯特城隨時出洋相，兩軍都有強勁入球能力，推介入球大。

（有線61及201台周日早上11時30分直播）

巴黎聖日耳門今季有伊巴謙莫域離隊，但進攻火力依然強勁，新加盟嘅賓艾化可憑個人能力拎到入球，就連後防奧里亞、大衛雷斯等都頻頻上前助攻，只不過佢哋防守明顯唔掂，之前熱身賽試過擺烏龍、手球輸12碼等蝦碌場面，時不時「發波瘟」，難予球迷信心。

巴黎聖日耳門對住英超球隊，經常開出大手交易，近5次鬥英超球隊，有4次總入球達3球或以上。李斯特城雖有前鋒占美華迪未歸隊，不過另一王牌馬列斯狀態十足，上仗國冠盃對些路迪仲射入金球，球隊嘅快速反擊踢法，有望喺巴黎聖日耳門不穩防線度拎到着數，入球肯定唔會少。