借題發揮：今期出夠13駒 唔慌會衰 大摩兵力非凡

魑魅魍魉

　　大摩馬房踏入季尾明顯又開着副摩打，之前起個孖都好似好辛苦咁，事關自從15/11嗰期單日贏兩W之後，要隔成三四個月至識得起孖（14/3），但跟住落嚟就見佢攻勢一浪接一浪嘞，好似最近呢三期賽事，31/3一W，4月跑了兩期，已連中兩期孖寶，熱W有「勁勇士」、「馬風雲」，冷W亦爆到唔信，十幾以至廿幾倍嘅「步步穩」和「星際雄師」照贏，按理呢期佢有成13駒參戰，結合埋近期馬房嘅手風，點會冇大攻勢！

　　事實上，睇番阿摩隔夜唔少馬都有晒墊底飛，贏開嘅「神州八號」固然惹飛，而新簇簇嘅「讚惑」，就算同場面對「獵豹小子」及「旅英駿駒」，票數一樣唔冷落，至於上次跑尾二嘅「卓爾非凡」，睇飛數亦唔「赦」嗰匹「歡樂繽紛」，其餘唔冷落嘅仲有三幾駒，所以，連隔夜賠率都對辦，呢日應該會係阿摩嘅big day！

騰雲駕霧易廐四出三W

　　講到心頭好，亨利就會揀「神州八號」、「騰雲駕霧」及「卓爾非凡」，前駒上次點贏都見識過，入到直路完全當啲對手唔係嘢，當佢喺拉士二百米撻着後勁，輕描淡寫飄離晒，所以，睇唔出跑此程會唔啱。而「騰雲駕霧」轉到大摩之後，四出得三W，唔得嗰場係心律不正啫，叻成點真係唔知，計落贏得「喜盛龍」、「大家開心」，三班重磅也不怕。

　　至於「卓爾非凡」，又係嗰句囉，跑完打吡做番自己，上次跑長途輸成點不用深究，前仗可以叻到與「勇敢小子」在同程埋Q，計正今場檔位冇變，磅頭差無幾，同隻「歡樂繽紛」有得揪啩！？ 　

亨利