馮諾嘉手記：傾城之力 部署捧盃

魑魅魍魉

　　今日沙田十場賽事，兩泥八草，難得係周末，下周三又冇馬跑，今日跑完大家就可以休息一下，聽日同屋企人過番個Family Day。

　　心水場次先睇第六場三班1800米草地，爭獅子會盃，用「印度光輝」做膽，前仗跑同程後上追勢相當吸引，末段造快時間贏馬，上場由於「引伸波幅」出閘就搶放，頭兩段步速甚快，搞亂成場賽事嘅步速，落敗不足為據，今仗回配韋達，可以贏多場。配腳方面，「銀影激光」季內已三次入位但未嘗一勝，上場跑同程只係以短馬頭位輸畀「引伸波幅」，屈居第二，乘勇再戰實好鬥志，相信可以再次跑入前列。「駿馬精英」今季頭三仗都係跑後上，上場一改作風，一放到底贏馬，開竅後再贏唔奇，上季尾跑2000米只輸頭馬個半馬位，今場跑1800米絕對啱腳法，要拖。「將軍歡笑」季內只跑過三場，由1400增程今場1800米，雖然未有根據，但之前三仗都跑入前四名，勝在演出穩健，不妨拖埋。

　　第八場三班1200米草地，角逐北京會所周年盃，呢場好有強弱懸殊嘅感覺，除咗「傾力之城」同「相見歡」近仗表現突出，其餘對手近績都係麻麻，加埋三匹在港初出馬，真係搵膽容易拖腳難。「傾力之城」季內四戰同程非冠即亞，狀態勇銳，上場遇強敵屈居第二，今場強配韋達，補中兼捧盃有晒部署，做膽。「相見歡」經常跑入前列，演出準繩，上場喺柏寶胯下以個半馬位輕取對手，今場有「傾力之城」領放，排二檔嘅「相見歡」可以貼欄守好位，配腳首選。其餘原班馬近績一般，剩番兩席配腳不如就搵初出嘅「好好運」同「萬事綵」，兩匹馬試閘走勢都唔曳，有賠率不妨作配。

幸運愛駒轉倉即搏

　　第九場三班1400米草地，馬膽揀「幸運愛駒」，季內雖已獲兩冠一季，但上場大熱倒灶，隨即轉投東廐，睇得出馬主求勝心切，操足至復出，排二檔亦有利，可望即刻鸁馬向幕後人交代。配腳首選兩戰獲冠亞各一嘅「奇葩」，其次係上場同程跑第四嘅「新薪」，最後係上場喺呢程跑第三嘅「好有勝」。