馬主論戰

魑魅魍魉

鍾意時時攞彩

　　剛戰呂健威憑「福到多多」贏馬，搏殺手風幾順，我睇好佢今日繼續有馬贏，最啱心水係第二場「時時攞彩」，前仗初跑泥地1200米即一放到底贏馬，證明泥地性能出色，上場轉跑草地亦上名，證明近態好弗，今次跑番贏馬路程可贏番一仗。

　　另一匹要留意嘅呂廐馬係第四場「連冠精英」，上場休後復出狀態未十足，加上轉彎走外叠發力，輸咗唔使太過介懷，今次繼續跑番強項1400米，換卓利操刀應該有唔同發揮，不容忽視。

（梁廷鏘）

時時攞彩科研精英泥料

　　今日我將會同一位嚟自東莞嘅朋友王柏桃入場食晏，仲會同埋佢一班同事齊齊遊覽一下沙田馬場，希望佢哋可以帶畀我好運喇﹗講番心水，鍾意第三場「科研精英」，上場初跑泥地即刻彈甩對手贏馬，證明泥地性能真係好得，今次上班跑都冇有怕，可以再贏。

　　另外要吼埋第八場「傾力之城」，今季四戰獲兩冠兩亞，擺明係質高分子，上場早段畀人頂出第三叠跑，能夠保住Q腳已經算叻，今次對手已經唔見「明燈」呢類馬，有權補中。

（張敬山）

吼實幸運愛駒

　 　雖然蔡約翰響沙田戰績彪炳，但係告東尼田戰表現其實都唔曳，今次派出多駒上陣，睇嚟輪到佢威。先留意第九場「幸運愛駒」，響摩廐跑五場獲兩冠一季，成績其實唔曳，轉由告東尼接手必寄望繼續有表現，呢次轉倉初出已經要吼實。

　　另一匹東廐惡馬係頭場「獵豹小子」，初出已經響直路賽輕勝，肯定有質素兼早熟，上仗雖然輸畀今次又同場嘅「旅英駿駒」，但其實表現都唔曳，三歲馬有多一場經驗之後，我有信心佢可以反先對手。

（任達華）