洪禮賢講馬：無雙小子博得過

魑魅魍魉

　　呢期開始柏寶停賽３日，但之後韋達都要停，仲要多阿寶１日，所以佢實會「積穀防饑」，尤其睇佢隔夜騎師王得12皮，三兩Ｗ應該閒過立秋。至於大摩馬房，十幾隻馬一次過攞出嚟跑，誠意夠晒，點都要信吓。

重心場次

第8場 第三班（80－60分）1200米

　　草地傾力之城熱到得十幾蚊獨贏，之前點勁點勁，都唔使多費唇舌，總之今場冇「明燈」在陣，而佢排檔又好番，對準最佳路程，坐定粒六。

    　「相見歡」上場贏來輕易，除了外叠蝕得起算佢本事之外，陣上唔多覺佢有以前唔投入的舉止（搖頭晃腦），確認進度唔細，如非唔孭得磅，乃前駒眼中釘。

　　「長勝」忽好忽曳，惟前仗入Ｐ水準ok，在其左梗壓線的「特色咖啡」和「威海歡騰」，再出皆有Ｑ，肯縮回最有根據路程，隨時又返嚟。

　    「無敵福星」博博吓而已，唔知２月缺課影響有多大，但季內唯一上名就係呢程，有賠率拖吓。「大把在手」及「萬事綵」的隔夜賠率比預期熱得幾多，睇飛有異動。

第1場  新馬 1000米 草地

　　獵豹小子及「旅英駿駒」上次一Ｑ返，雖則後駒係有睇住嚟食的姿態，但加磅後係咪即刻適應到，唔跑過點知，反而前駒有過一場重磅經驗，能力可會比上場叻。

    「讚惑」及「星運俊爵」３月中一齊試大閘，彼此出閘反應唔係好，如果睇番全程走勢，前駒討好多少。「幸運多多」加頭罩應有幫助，因從陣上所見幾細膽吓。「軒轅勇將」跑速度得一段力，睇吓捱到去邊。

第2場  第四班（60-40分）1200米 泥地

　　宇宙良駒撞正可能冇馬放場合，本身速度夠，檔位未算好曳，有權搶欄自領，如形勢啱夾，可提升名次。「風陵渡」唔知點解上場衝落唔多，或是之前兩度入Ｑ用了力，回一回用番雄仔，帶罪之身必然跑得好好睇睇。

　    「時時攞彩」前仗賺晒形勢亦贏得唔遠，今次重磅而賠率實熱，最多拖腳。「皇帝旨令」剛仗殿軍的水準普普通通。「高歡」如果唔係擔心細細粒未必應付到泥地，呢次一定重視。「飛魚駿王」陣上仍見跑來會「片」，不過前速好，兼且唔少家族成員啱泥地，12檔如放得出，唔係冇機會帶到。

第3場  第三班（85-60分）1200米 泥地

　　盈彩繽紛血統有美國色彩，本身又夠重秤，場地性能有揸拿，阿蔡「無啦啦」轉場應有把握，加埋檔好，有望保持不敗。「科研精英」一轉泥地即刻贏到冇晒對手，升班唔驚，仲要檔好磅輕，第二勢力。

    「時代明星」時刻在此程都起到作用﹔「名店之星」亦然。「實業輝煌」上場大好形勢返嚟輸少少，呢次縱然磅輕，對手再唔係四班馬，唔係易啃。「勁飛馳」上賽已揀，但雙重加磅唔係冇壓力，爭位居多。

第4場  第五班（40-10分）1400米 草地

　　愛拼者贏置身一場前中段未必快的場合，佢嘅守好位跑法可能好啱，雖然長途縮回此程係有難度，總覺佢減分真係過晒火位，既有態，唔難克服。「偉感」上賽前已指出陣上走規明顯乖咗，未展示到成果只係路程未配合而已，而上仗一經轉場可入Ｐ，仲要係跑法轉埋嘅情況下，賽績具指標性，而計落加程有好冇壞。

    　「極速寶寶」上次追得勁可能係技止於此，但另一角度，直路前後的發揮又未盡完善（早段跟唔住亦蝕底），所以，呢次成績好與壞，好睇騎者經過上賽後有幾多領悟。「晨速」長期可爆一段嘅馬，回到此程會更惡，只擔心冇步速佢就企晒喺度。「綠翔王」出現前所未見的能力，追寶尾，唔戇居。

第5場  第四班（60-40分）1400米 草地

　　旅遊大亨一冇痰就贏，看似贏嘅距離唔遠，如果唔係蔡仔喺直路攪咗一輪至擺正軚，在拉士200米才開始衝，相信至少贏個幾身位，所以如非負重能力差，再Ｗ。「神勇將軍」早已講過中程方是目前出路，上賽入Ｑ已是最好證明，好開唔轉程，再追。

   　 「神州八號」唔知之前隻眼有事影響幾大，不過準備上冇點斷過，仍要重視此匹新勝馬。「精英財星」近仗一再於短途跑得好，嘗試轉此程冇理由唔勝任。「中環英雄」剛仗入Ｐ姿態好誇張，但初上此程有難度。「飛躍之鋒」上場好似陣風咁竄上，呢類馬一見好，或即到位。「幸運相架」冇馬走，對佢嚟講正晒。

第6場  第三班（80-60分）1800米 草地

　　無雙小子上仗喺一場發緊夢嘅賽事追得好，那個第六名的賽績ok，情況一如該場「紅跑車」，寧負重都唔用小將，用番硬淨配搭再跑長途，如跑出季初贏同程水準（C+3欄），磅頭重多少亦不礙進取。

   　 「印度光輝」一用韋達硬係跑得唔好，信邪乎﹗﹖「銀影激光」啱啱入Ｑ，事後睇番唔係冇水準。「將軍歡笑」唔少哥哥跑此程特別好（如「好日子」），加上太輕磅，有危險性。「旺國手」上賽末段如非受阻，應會更有威脅，無論如何，跑回草地長途一定更啱。

第7場  第一班（115-90分）1000米 草地

　　明燈銳勢着晒火，殺上一班冇有怕。「金德寶」直路賽叻到出神入化，既然在1200米撞完板，肯即回到食胡路程，再畀機會。

    　「極奇妙」唔去日本可能仲好，實情今季真係幾準，同埋與德叔幾夾。「紀利威龍」及「開心歡笑」唔排除會有三三四四。「樂意洋洋」剛仗名次幾後，但主因係塞車，臨近終點其實有點衝刺力，嗰幾步竄勁已好耐冇見過，或是回蘇先兆。

第9場  第三班（80-60分）1400米 草地

　　聖河上場之敗，賽後報告已解釋晒，所以唔使介意，總之有本事火併「沙貝利」之馬，一有mood的話，要在三甲佔一席有幾難。「奇葩」上場贏來比預期勁得多，如果唔係贏完即刻冇晒體力，13檔都唔係好擔心。

　    「較量」剛仗沿途取位形同賣大包，但直路一樣有兩腳，估計今場１檔起步，可令競爭力大幅升級。「騰雲駕霧」只係要博健康有冇事而已。「新薪」此程不及短途好。「幸運愛駒」係咪叻得咁緊要，抑或是轉馬房效應才會咁熱，個人傾向後者睇法。

第10場  第二班（100-80分）1600米 草地

　　歡樂繽紛始終係冇甩過前兩名之馬，賽績點都要尊重。「卓爾非凡」話晒前一場在此程與六Ｗ明星「勇敢小子」串Ｑ，實力也不簡單。

　    「喜盛龍」回到1600米，加上整體對手冇咁強，有望止跌回升。「暢蝦王」希望落入阿杜手上，此駒應有的後勁可得以釋放。