馮諾嘉手記：為保領先地位 蔡廐谷戰都砌

魑魅魍魉

　　日前薛寶力因頭痛未能上陣，之後更指佢要接受手術，小妹感到相當疑惑及擔心。由於同佢較少來往，呢個時候都不便打擾，唯有問吓佢身邊朋友有關病情。

　　原來薛寶力三月尾開始已覺得頭痛，之後都不以為然，但到四月初又再痛就去睇醫生，經進一步檢查後至發現腦裏面有瘀血壓住神經線，所以需要做手術除瘀血，估計係因為佢早前撞到頭部引起。到四月九日朝，薛寶力接受咗首次手術，原本情況並無大礙，但據悉其後響十一日晚上佢又需要接受第二次手術，至於目前情況如何，小妹都需要再打聽一下。

　　講真嗰句，接受頭部手術向來唔簡單，記得對上一位頭部需要做手術嘅騎師係戴勝，響05/06年度季尾，佢策騎「雄心快馬」墮馬並被踢中頭部，需要送院接受手術，好番之後雖然可以再出賽，但係鬥心與狀態已大不如前。當然，薛寶力情況冇咁嚴重，但係小妹都希望佢好好休養，快啲好番重上馬背。

　　噚日講過於騎師龍虎榜競爭激烈，但其實練馬師榜都鬥得相當緊湊，近期蔡約翰響沙田賽事，唔係起孖就中三元，好似剛戰就順利憑兩匹「繽紛」系馬起孖，眨吓眼已經累積咗52場頭馬，拋離第二名嘅告東尼八W之多，睇嚟真係愈贏愈起勁。

　　蔡約翰響沙田賽事就巴巴閉，但係谷草成績就認真麻麻，暫時只係贏得三場頭馬，上周三谷戰憑「欖球樂園」同「活威小子」入Ｑ，成績已經算唔錯﹗點解貴為多屆冠軍練馬師，蔡約翰一過江就唔掂﹖小妹心諗，可能蔡神仙唔想旗下馬成績畀「檔位大抽獎」拖累，所以每次谷戰都唔報太多馬上陣，將大批質新分子留喺沙田出擊。不過，今次谷草日馬，蔡廐共有六駒獲正選，當中「沙貝利」、「明燈」都有實力，似乎為保領先地位，響谷草都要打硬仗，即管睇吓有否成績交出喇﹗