洪禮賢講馬：澳港盃主隊話事

魑魅魍魉

　　今個禮拜好戲打孖上，先有周末澳港盃賽日，翌日則是本地谷草日賽。事實上，周末賽事將是歷史性一刻，雖然唔少港人唔係冇接觸過澳門馬，而投注澳馬更唔係咩稀奇嘅事，早於十多年前，當時在港投注澳馬好方便，只要有戶口，足不出戶，在家有得睇又有得賭，只係跨境博彩條例彈出實施後，我們才唔多接觸到澳馬。不過，呢期澳門馬賽日，港方將之視為越洋轉播賽期，而這回將屬首次，希望屆時場內熱熱鬧鬧，而兩地的turnover又好，如此盛事便可三贏啊。

　　當日轉播賽將有4場，除了戲肉澳港盃，尚有幾場重頭戲，如一級賽澳門打吡（獎金仲高過澳港盃）、主席盃等等，但講到吸引力，澳港盃必屬首要，始終係主題日盃賽，加上唔覺唔覺已舉辦到第7屆，有番咁上下歷史和意義吧。而睇番過去的盟主，似乎係主人家叻啲，能夠打破壟斷局面只得「喜蓮戰略」及「勝利飛駒」，其中梗係阿蓮最叻，當年兩邊都贏晒。

港隊欠冠軍相

　　睇番今屆陣容，港隊那批依然係分高卻唔耀眼，可能「創佳績」已是最有冠軍相了，其餘還有「羅馬」、「活力飛駒」及「尚兄」。坦白說，「創佳績」8歲了，尚幸季頭至季尾仍有兩腳，只係上場泥地忽然包尾﹗而東廐兩駒「羅馬」和「尚兄」，前駒今季未叻過，連Ｐ都冇，後駒近期冇晒影，11月尾傷完腳之後去埋放草，5個月冇上陣了﹗「活力飛駒」跑嚟跑去到上賽才贏到場谷草短途，而呢次將會係佢咁大個仔首次跑到1500米，適應與否未知噃。所以，望落都係主隊餐士高，且看「爆料」之後，會唔會又係澳門馬得手嘞﹗