高清睇跑馬：戰士剛戰拉士勁

魑魅魍魉

　今季總場次477田草三班1400米，「戰士」除眼罩改戴鼻箍上陣，出閘後留在尾二位置，只比「正本大師」前一點，沿途位置未有改變，入直路依然遠遠落後，加上直路塞車未有空位，被迫抄出最外檔蝕位，起初推騎未算強勁，甚至四百米仍在尾叠，估不到過了二百米後追如箭，縱使早段落後極多，最後追入季軍，只輸畀頭馬「千江映月」一頸位，睇番末段締速更加厲害，跑出廿三秒六，是全場唯一跑出廿四秒以內末段之馬，而且再睇直路片段，發現因為內閃難騎要修正，加上拍得「千江映月」太埋，全程落鞭不多。周日回師首本谷中1200米，有力補中。

　　季內總場次466谷草三班一哩，「驚喜」出閘唔快順勢留後，巫斯義要推騎兩步先跟上步速，首次轉彎走三叠，其後切入二叠減少蝕位，之後一直走二叠尾二，過了七百米跟前多少，之後抄出三叠，然而推騎反應未算凌厲，入到直路依然在尾二三位置，誰不知牠看見前邊馬群，竟然喚醒鬥心，衝刺強勁殺入大冷位置，若非一度被「寶貝王子」及「海力童」封了去路，成績必定更好。復課加強備戰，並且吸引韋達過檔，周日出戰同程一哩，值得追捧。

Sam