洪禮賢講馬：怡勝卡士O喎﹗

魑魅魍魉

　　呢個禮拜日嘅谷草日賽，誠如前文所言，爆就爆梗，只係睇吓點爆法，而近日整多場雨，好似仲去到當日，場地偏慢，賽果更加易扭曲，希望唔好開口中﹗不過，時近尾聲，賽事多少也會反反覆覆，呢種現象唔會係今季先至發生，只因來到季尾，不論邊個班次，已累積一定程度靚績嘅馬，跑到嚟季尾嘞，體能仲頂唔頂得住，真係冇得寫包單，亦未必咁易在臨場察覺到。

　　尚記得之前主席錦標，該場兩大巨頭「締造美麗」和「勇敢小子」，臨場行圈之時，一眾拍檔都異口同聲指出前駒唔多對辦，行起上嚟冇神冇氣，同佢好起上嚟嘅時候有幾大分別，不過，我們亦認為後駒好鬼有mood，愈行愈醒目，講到佢識飛咁滯，最後兩駒都喺中游過終點，臨場靚嗰隻其實名次仲後啲，所以賽駒攰咗未﹖可能有時要上咗當至知﹗

部分對手體力成疑

　　周日第七場一班1800米，部分馬季內真係跑得幾多，又或是搏得幾密吓，譬如「陽明好好」，今季跑到第11場了，而「特寶樂」，直落4場冇W有P，雖然唔敢話佢哋機會等於零，但始終有掉頭回落的可能性存在。感覺上，同場「怡勝」好似抵博多少，至少場地性能O喎，曾經試過落住傾盆大雨都上到名，所以，周日地淋佢仲好發揮。當然，講到實力，佢亦唔輸蝕，假假哋兩場之前才在田草1800米入P，只係輸啲畀「好日子」及「好先生」，話晒都係一場級際賽，計落就算今次孭到133磅，亦會讓得起，何況，佢在此程冇W有Q，呢匹路程專家值得捧。