借題發揮：「此刻」手風順 鄭雨滇如有神助

魑魅魍魉

　　想用三兩句講講題外話，唔想講馬住，因為今日將有玉樹地震的悼念活動，青海全省，以至全國會下半旗哀悼。而作為中國人的你與我，雖則地震不在此地，也會感到哀慟，總希望大家可伸出援手，有錢出錢，有力出力。

　　講番正題，啱啱鄭雨滇喺谷草日賽贏夠3場，亦係佢季內首次單日連中三元，唔話佢旺都唔得啦，以「好歡騰」為例，眼見過終點好似叮噹馬頭鬥輸，最終都影贏埋，而全日埋單計數3W2P，成績好美滿。雖然，有時騎師們會出現輪流威的模式，但打句問句，佢今期有部分坐騎幾得噃（頭尾場嗰兩隻唔計！），再斬四両唔奇。

　　譬如「神箭金剛」和「此時此刻」已經有番咁上下能力，前駒上場都係阿滇跑，但賽後畀小組抽秤，話佢唔夠決斷力，睇番當時處境，其實真係兩難局面，入直路前走出定走入，根本冇話對與錯，怪只怪該場「龍馬精神」末段內斜，令到阿滇被緊迫。點都好啦，今次落班繼續由佢跑番，一定醒醒定定咁處理，更何況，隻馬季初正正喺B欄五班呢程贏馬，該役打低之後贏埋四班嘅「呼風喚雨」，證明佢嘅卡士有幾勁。

連利威勁錢程萬里P當W賭

　　而「此時此刻」上場唔見得跑得好，輸咗唔覺係咩一回事，用番前一仗表現去秤，快鬥快之下幾乎入Q，輸唔到一個身位畀「同心威駿」，呢次換人好分咁多，點解唔博多次。另外，「連利威勁」與「錢程萬里」，隔夜幾冷吓，但亨利對兩駒皆有feel，贏唔贏到唔敢講，冷P當W賭，其實幾好水位。

亨利