馮諾嘉手記：精英財星 外檔都德

魑魅魍魉

　　今晚谷草八場賽事，採用B欄C彎作賽，睇番上次同一條跑道嘅賽果，都係以內檔馬成績較好，一出閘就可以貼欄守好位就最着數，今晚內檔馬當然要秤先。

　　三場心水正好係三T場次，第四場四班1200米，用「精英財星」做膽，至今跑咗好多場仲未開齋贏馬，上場轉苗廐初出，再一次跑第二，苗禮德一心求贏馬作交代，乘勇再戰，後上馬排外檔冇乜影響，大可後追制勝。配腳先拖上場只以短頭位之差獲亞軍嘅「得令先鋒」，上場快放跑第三嘅「勁辣椒」，同埋上賽跑得接近嘅「金巴利來」，都係拖腳佳選。

滙名燈內檔連捷

　　第五場三班1200米，馬膽揀「滙名燈」，出賽至今七仗全入前四名，演出相當準繩，當中兩場贏谷草1200米，上場贏同程，姿態有餘未盡，乘勇再戰，又抽到內檔，有權連捷。配腳第一匹拖「御將軍」，近三仗跑同程獲冠亞各一，上場只係以頸位之差輸畀貼欄守好位嘅「滙名燈」，走勢出色，可惜今次再度碰頭，「滙名燈」排檔較理想，有機會跑出翻版Q。「多多昇」近兩仗喺田草一再跑近，乘勇回師首本路程，絕對唔可以忽視，要拖。「魅力漢子」十歲老馬近三季都冇頭馬交出，但仍然唔肯退役，喺三班有啲着數，老馬搏得實搏，要兼顧。

　　第六場三班2200米，「錢程萬里」上場跑同程一放到底贏馬，爆19倍冷W，該場負磅同樣係131磅，加五分後仍然喺三班作賽，上場已證明唔怕負重磅，大可連捷，做膽。配腳方面，「紅跑車」近三仗都入位，輸亦唔超過半個馬位，未能贏馬，有多少失運，既然跑1600、1800米未能贏馬，跑長啲可望有突破，排三檔可以貼欄跑，拖腳首選。「浦紅之友」上場落敗但跑近，今次谷草2200米係首本路程，五戰同程獲兩冠一亞一季，路合要拖。「正歡騰」上場排大外檔，沿途外叠競跑而大敗，但前仗同「錢程萬里」同場，貼欄跟住對手跑獲亞軍，今次回師谷草2200米，大可重施故技，跟實「錢程萬里」跑，可期再入三甲，要兼顧。