馮諾嘉手記：柏寶姚本輝隨時起孖

魑魅魍魉

　　為哀悼青海大地震遇難同胞，前日被定為全國哀悼日，並停止所有公共娛樂活動，前晚馬照跑，小妹覺得好奇怪，記得上次四川大地震全國哀悼日，馬會取消當晚嘅跑馬地賽事，之後先至補賽。原來，今次馬會係想將賽事嘅盈利用嚟賑災，將收集所得善款用嚟購買救援物資，馬會一向係大慈善機構，當然要出一分力，所以各位馬迷都唔好慳，見到投注站嘅捐款箱不妨支持吓。

　　上次日賽韋達中三寶，上番騎師龍虎榜頭位，話口未完啱啱夜賽又連中三元，將頭馬數目帶離柏寶三場，但係周日柏寶終於停完賽復出，一定反擊，兩大騎師都騎足十場，彼此都有唔少實力馬喺手，睇牌面柏寶手馬勝算大啲，淨係其中兩匹姚本輝馬房嘅馬，已經有機會起孖。第三場四班1200米嘅「蜚聲」，跑咗兩場都入位，初出跑同程已經有唔少支持者，被捧到6.3倍，最終只以四分三馬位之差跑第二，上場更熱到得番1.8倍，可惜遇上「好利利」，對手一放到底，「蜚聲」再度屈居第二，呢場強敵已去，好大機會贏馬開齋。

　　至於第六場三班1600米嘅「傳奇快車」，季內多次跑入前四名，狀態一直保持大勇，前仗初次增程跑1600米，只係以馬頭位屈居亞軍，證明1600米啱發揮，上場再戰同程由黎海榮策騎，入直路「塞車」受困，終點前一百米先至望空，今場換上柏寶，可收復前失。