馮諾嘉手記：騎師走位差馬迷最激心

魑魅魍魉

　　有時睇好一匹馬，評估過佢嘅利好優勢，唔稱得上實食無黐牙，都可以話係信心十足，假如最後係輸畀另一匹更強嘅對手，只好怪自己走漏眼，睇錯咗，但有時睇見啲騎師走位麻麻，又或者取位未如心中所想，真係即時氣上心頭。

　　上周夜馬賽事，有兩場賽事就令我十分氣結，第二場五班一哩賽終點前，「精靈拍檔」外閃，同時「我跑得」就內閃，「好利高」因而夾喺中間做三文治，明明用「精靈拍檔」做膽，睇住「好利高」條Q跑緊返嚟，結果只係因為騎師騎得論論盡盡，「好利高」受阻之下只係輸條頸跑第三，匹馬賠率比「我跑得」好分得多，咁樣之下只係中得位置Q，收獲因而少一大截，真係激到生蝦咁跳。

　　一波未平一波又起，接住第三場三班1200米就仲激心，賽前一早睇好冷馬「定做」，埋門獨贏、位置、連贏都着晒啡燈，可見幕後人信心十足，雖然賠率被打熱咗，但獨贏都有成十九倍，賽前已喺專欄中預期佢嘅跑法，前一場因抽外檔被迫留後，並唔係佢最佳跑法。

　　睇番佢喺愛爾蘭賽事，贏嗰場係放頭，而當日一檔起步，出閘後貼欄領放十分好跑，估計有機會放到，結果跑成點大家有目共睹，入直路可以由一檔閃出到大外檔，漏咗條內檔畀頭二馬「六六精英」同「多多昇」，「定做」輸個頭跑第三﹗

　　其實「定做」三歲馬咁質新，出閘後就應該預咗打左手鞭，仲要明知匹馬外閃都要繼續打右手鞭，唔懂得轉手換鞭，直路愈閃愈外，蝕位無數，相信唔外閃的話，只係齋推唔打鞭都夠贏，佢跑到第二都仲可以中條六百幾蚊嘅Q，相當和味，依家跑條熱門Q得85蚊，縱使中晒Q同QP，收獲差天共地，遇到呢啲咁嘅賽事，睇啱睇準形勢，但最終敗於騎師走位就最激心。