利華馬體會拉鋸獻細

猪拉多纳

唔夠卡士 Vs 唔同你急

歐聯16強首回合，利華古遜主場對馬德里體育會，利華古遜本身並非德甲一線勁旅，去到歐聯舞台，拍埋上屆亞軍馬體會身邊，水平更加相形見絀，即使有地利亦難佔甜頭。馬體會教練施蒙尼屬於務實派，踢歐聯往往以穩陣行先，今屆分組賽鬥另1支德甲班霸拜仁慕尼黑，都係1球上落，來到淘汰賽更加唔會冒進，今仗預期係拉鋸戰，首選中位數2/2.5球入球細。

（有線62及202台周三凌晨3時45分直播）

利華古遜今季德甲僅排第8位，足足畀榜首拜仁慕尼黑拋離20分，已淪為德甲二線球隊，佢哋今屆歐聯分組賽亦僅以次名出線。講到利華最威時期已經要數到2002年打入決賽，但之後再未能突破16強關口。上述數據及成績正好反映，以利華古遜嘅水平踢歐聯，根本唔夠卡士，難有作為。

更不幸係利華中場主力查漢奴古早前因為違約事件，被罰長期停賽，呢位罰球專家今季德甲有6球進帳，歐聯亦有1入球及1次助攻。查漢奴古缺陣之下，利華入波瓣數更少，惟有靠查維亞靴南迪斯數胡，馬體會肯定嚴密凍結佢。

馬體會過去3屆歐聯可以2次打入決賽，全因教練施蒙尼防反戰術夠實用，今屆亦唔例外，6場分組賽只入7球，但就贏咗5場，其中3場小勝1比0，包括主場贏拜仁慕尼黑。睇波欣賞指數比較低，但戰術層面非常成功，馬體會輕鬆提早取得首名出線權，再次證明呢種踢法好適合應付歐聯，應會繼續沿用。
近4歐聯交鋒全細盤

論經驗及實力，馬體會可以秤先，但考慮到首回合作客，唔一定要贏，不敗而回已經達標，等次回合返主場要搏都未遲，客W風險高。而且馬體會同利華古遜近4次喺歐聯交鋒，法定時間各贏1次，其餘2次握手言和，4次總入球都係2球或以下，近2次更加係「1:0」，最好追入球細。