洪禮賢講馬：判斷出錯隨時惹禍

魑魅魍魉

　　過着爬格子糊口的日子不長也不短，匆匆十幾廿年了，假設人家叫我交段五百字的稿件，通常小弟都會寫多三幾十字，無他嘅，都係想方便人哋，刪字總好過要人幫你加字嘛，雖然表面上好似蝕了一點，連標點符號都計埋，啱啱湊夠五百字，我夠知唔會蝕，問題係有時開行、開段後，會少了實際字數，寫多少少唔會死，點解要咁吝嗇。

　　情況放諸陣上亦一樣，臨近衝線時，各個騎師搏緊命，為坐騎爭取最佳名次，如果好些騎師以為壓線嘞，騎少一兩步，萬一唔好彩，自己睇錯位，判斷出錯，嘩，到時真係有故講，所以只差唔夠一秒時間，何解唔騎埋落去，尤其係有機會爭入前四名嗰啲環境，騎多步又唔會死，難明點解唔騎多步﹗以為慳得一步得一步，你估家陣去超級市場買嘢，慳得一蚊得一蚊咩﹖﹗

何澤堯險出事

　   在上周六第三場，正當「威威財星」過終點之際，已覺何澤堯最後一兩步好似過早企高身，而賽後報告中，小組亦有提醒他，只要情況許可均須力策坐騎至終點。雖然小組指出並不影響最終名次，但當時喺佢出面有「可圈可点」及「皇仁勁駒」，三駒係爭緊個有派彩名次嘅季軍，如果佢再早一步放軟手腳，好大可能已經出事嘞 ﹗

　　資深如白德民，上季尾也曾因類似個案而被罰（未有力策「六六精英」至終點），當時佢仲只係爭緊第四至六名咋，咁都換來兩日停賽，如果係有派彩名次嘅，十日八日應該走唔甩啩﹖﹗無疑，小何只係新人，唔可以要求太高，不論佢外地賽績叻成點都係咁話，但全程力騎到尾其實係基本嘢，如果連呢點都做唔到，總有日會出事。