卓利出馬大家開心

魑魅魍魉

　　今日除咗十一場本地賽事之外，夜晚仲有越洋轉播賽，新加坡國際短途錦標同新航國際盃兩場都咁有睇頭，尤其係短途錦標嗰場，三匹香港參戰馬「鳥語花香」、「時尚風采」同「綠色駿威」，都有一定勝算，前駒早前大熱輕勝女皇銀禧紀念盃，今場只要克服外檔就有機會。而「時尚風采」三月尾角逐喺杜拜奪得阿喬斯短途錦標1200米，贏咗唔少強手，今次轉戰新加坡當然更有信心，隨時贏番個遠征孖寶。「綠色駿威」上場喺短途錦標只輸短馬頭位跑第二，呢次排一檔有利，亦唔可以睇小，呢場港隊最強嘅對手係「火箭人」，相信競逐過程一定精采。

霹靂槍賺形勢

　　精選場次第四場三班1200米，用「霹靂槍」做膽，上場跑同程只係以半個馬位輸畀「飛闖」，未開齋鬥志唔使懷疑，呢場放頭馬唔多，排三檔可以貼欄慢放，隨時放到。配腳有上場初出後上跑第三，追勢相當凌厲嘅「闊袍大袖」，柏寶繼續騎，拖腳首選。「戰河」喺海外多數跑1400米，在港首戰跑1200米亦啱腳法，試大閘走勢唔曳，要拖。後備補上嘅「天久」在港兩戰都入位，愈跑愈近，大把進步空間，要兼顧。

　　第六場四班1400米，馬膽「幸運相架」，近兩戰獲冠季各一，上場排十檔起步，由頭放到尾，贏對手個半馬位，睇姿態大把在手，今場同樣排外檔，用番上仗跑法，連捷應冇難度。配腳先拖近仗都跑近嘅「松風」，其次係連場入位嘅「雄心馬主」，最後係新勝猶勇嘅「信賴」。

　　第十場三班1600米，「大家開心」近兩場跑同程都入位，前仗更只係輸短馬頭位，上場因排得外檔，起步後即被迫二叠競跑，今次初配卓利，騎者同李易達特別合拍，所以今次一定會把握機會做到最好，加上抽到三檔形勢有利，可以貼欄守好位，做膽。配腳方面，先揀「豪情拍檔」，近仗獲冠亞各一，上三班負磅減輕，有條件再爭。冷腳吼「迎利多」，跑咗兩場熱身足夠，早前試大閘走勢對辦，排二檔亦好跑。「本地實力」前仗同程跑第三，亦可以兼顧。