借題發揮：蔡韋拍硬檔爭冠軍 戰河搏頭圍

魑魅魍魉

　　上期谷草夜賽，估到韋達復出唔似樣，未必會即刻有本事反撲，結果佢成晚埋單得兩P。不過，亨利都要認衰仔，以為二奶唔搏命，大婆實發圍，點知柏寶果晚一樣係企咗喺度，僅得4P交差，最慘連熱辣辣嘅「輕輕鬆鬆」，都可以連P都冇，相信唔少好似亨利嘅馬友，果晚捧阿寶，註定直通車！

　　而今期反過來覺得阿寶啲馬唔多對路，部分更熱得嚟唔覺有冠軍相，睇嚟係阿二韋達發力嘅好時機，希望唔好又只係估啱一半！事實上，目前佢兩個相距6W，剩番17期賽事，真係進入冠軍之路嘅尾聲，你睇阿寶連「綠色駿威」都唔吼，就知有幾重視，所以，韋達要十連冠，少啲毅力都唔掂，一旦有揀手貨在手，呢排唔應該會遊魂啩！

成隊兵喺度

　　唔使問阿貴，韋達要攞成績，一定要大水喉蔡約翰射住，而呢期好明顯佢哋成隊兵攤晒出嚟，唔係大搏殺係乜？更何況，阿蔡今季唔係穩贏，只多大摩8W，有乜「依郁」可能帶唔到尾。而既然之前韋達停賽4期，蔡廐19駒之中只贏到1匹，儲了子彈等埋韋達沙田賽期，仲唔釋放力量等幾時。像「好利利」及「歡樂繽紛」，上場同日搏輸，換番更熟手的韋達，有好冇壞。至於未跑過嘅「陽明飛飛」和「戰河」，試大閘立心唔畀大家睇，但都係樣靚身材正之輩，尤其係後駒，除非呢場短途用嚟開氣，如果唔係，一出即刻會有嘢睇。 　

亨利