洪禮賢講馬：天久輕磅更惡

魑魅魍魉

　　上期谷戰屬全華將之夜，但今期兩大巨頭柏寶及韋達皆多好馬在手，尤其係後者，粗略估計，餐士面也有三四駒，如果呢期唔能夠追貼阿寶，賽果應該扭曲得幾緊要，頻頻爆冷。

重心場次

第4場  第三班（80-60分）1200米 草地

　　天久連續兩場直路都內閃，但陣上仍有相當殺傷力，有本事與「明燈」、「傾力之城」串Ｔ，又曾與再出再贏「相見歡」構成連贏，實力唔係一般同級馬可比﹔除非今場用何澤堯因加得減，如果唔係，只負111磅，威力必更大。

    　「共創未來」一場比一場叻，前仗出閘唔靈敏，追勁也普通，但見剛賽陣上瓣瓣掂，按理第三回合仲勁，只虞12檔影響有多大。「戰河」近兩個大閘係咁捉住，唔想show走勢畀大家睇，結果一再出現欲蓋彌彰的走勢，如果唔係睇得唔打得，靚仔馬未十足都有得爭。

　    「闊袍大袖」初出陣上處理手法含蓄，仍然有Ｐ算本事，反映起步分着數，唯一要考慮係開氣後1200米可能略嫌短。「霹靂槍」或會賺形勢，惜從來未試過打叠好，限拖腳。

　    「松林之星」此程專家，有番足夠日子調節，縮回此程也易應付。

第1場  新馬賽 1000米 草地

　　軒轅勇將剛仗亮相時明顯流汗的程度及情緒波動性有改善，就算仍然略急，已比佢出道早期乖巧﹔愈來愈收斂，令陣上貫注力變得更韌，回到直路賽仲好跑，屬爭勝要角。「超晒班」3月中曾缺課，唔知影響進度有多大，但初出好嫩水都有Ｑ，質地唔差得去邊。

    　「陽明飛飛」進度未夠，卻有不錯型格，七八成馬睇吓夠唔夠爭。「福建王者」初出和今賽前試大閘，出閘一樣「甩咳」，但本身天生速度幾高，如呢次出到閘，一口氣帶到唔奇。「幸運多多」跑落進展較慢﹔「新三刀王」韋達試完唔揀，唔代表唔好，冷門可拖。

第2場  第四班（60-40分）1200米 泥地

　　神殿老馬來到季尾尚有幾強戰鬥力，像前仗不利追都有殿軍，希望因應今場步速或傾向快，有利佢發揮。「常山鳳寶」和「實業輝煌」四班贏點卡士，不過俱因重磅令能力下降。

    　「開心好多」上場好位返嚟冇位置的確意外，就算呢次落班、加配件及換人，但計番外檔與磅重的不利因素，唔見得着數。「馬皇帝」上賽或因早段被撞upset咗，敗績不用計，以初出同程輸近的水準，其實在此有得爭，但一下子跌磅太多非佳兆。「勇蹄飛」有班底，近績穩，在此已算條件好。

第3場  第五班（40-10分）1600米 草地

　　濰坊降班即重新綁脷，原來自從上季除脷帶後，連跑18場都冇P，看來立心等落班才郁手，加上好耐冇打王牌，忽然重用，更顯戰意。而兩仗前四班同程差啲衝入Ｐ，交得到該後追勁，呢批對手邊頂得到。

    　「驃騎將軍」和「日麗中天」上場輸近賽績或是受惠慢鬥慢場合。「極速寶寶」陣上唔易操控，在柏寶手上或可得到最佳發揮。「勁霸龍」剛仗擔心2000米唔到，跑梗頸四唔奇，縮回此程效果應比前好。「智勇非凡」C+3欄靠放隨時擴大優勢。「朝東之星」擺頭走及留後追都試過晒，今場1檔在處理上具彈性，說不定可突破三零部隊身分。

第5場  第四班（60-40分）1800米 草地

　　瀟洒大少如果上賽在處理上嚴謹及較進取，唔係冇能力上名，另一方面，似乎到了尾聲，本身又有番狀態﹔今次用上紮實得多的賴維銘，睇練者心意，唔係冇鬥志。「好運得福」上場已有揀，既然進軍長途令成績好轉，再跟。

    　「好旺財」唔叻但步步尺七的跑法，唔排除在今場會賺。「越跑越有」在路程上兜圈子，唔知為乜，不過排外檔未必守到好位，多少令能力下跌。「光芒四射」唔易駕馭，小楊未必勝任。「大東海」論盡馬還是大場啱啲，加程亦比一哩好。

第6場  第四班（60-40分）1400米 草地

　　幸運相架一再以主動跑法攞到成績，今場12檔如夠決心，未必克服唔到，仍有放到可能。「雄心馬主」4檔起步唔使焗留，用番守好位戰略隨時仲犀利。

    　「信賴」長期在前列歸來，贏完加磅有限，仍具威脅。「進勝福星」依然堅持上賽前的睇法（加程更合目前性能），除非今次又失常跟快咗，若不，或可勝回一仗。「福至心靈」與「高歡」跑法太被動，遇上呢場前中段未必快的場合，有機會追唔切。

第7場  第四班（60-40分）1400米 草地

　　中環英雄、「精密紡」及「漸信良駒」三駒各於上賽追得勁，惟後駒則初上此程，論穩健性稍遜。

　    「森淼獵鷹」置身一場冇馬放場合，開正佢嗰瓣。「確威星」轉馬房初出的走勢比預期失色。「標青」14檔及重磅，不易再有驚喜。

    　「創新高」上賽閘內忟晒，令早段留得唔順，多少影響發揮，落敗與實力無關，所以呢次換人及轉場也不敢睇淡。

第8場  第三班（80-60分）1200米 泥地

　　科研精英遇上5戰未輸過嘅「盈彩繽紛」，屈居阿二冇得講，初上三班可彈甩今次又同場的「勁飛馳」，賽績好強，置身今場好惡。

    　「勝利旋峰」和「時代明星」一對馬上場在此程分獲二三名，計條件屬正路配腳。「心歡笑」唔係放過草會睇高啲。「風陵渡」恃輕磅打拼。「自家威」突然冇晒飛，奇怪﹖「談笑用兵」只怕路短爆唔起，論評分在三班有級數。

第9場  第三班（80-60分）1400米 草地

　　千江映月如果唔係大塞車，上場唔會連位置都冇﹔匆出有誠意，本身卡士唔會比其他選手失色，追多次。「好利利」肯安排上中程，預期戰鬥力會大幅提升。

　　「清風送爽」重新開氣後即跑此程，看來之前追近的賽績是否霎眼嬌，今場應有進一步了解。「特色咖啡」上場1200米就算嫌短，但如非拉士百幾米受阻可能有Ｐ，反映現況「骨」，正頭正路跑番此程，要拖。「不言而喻」剛賽有番起色（大部分途程四叠仍輸近），肯返大場亦實際，最睇唔透。

第10場  第三班（80-60分）1600米 草地

　　大家開心三檔好易掌握賽事形勢，甚少大敗之馬，可信性高。「騰雲駕霧」勝在跑法機動性強，希望13檔不會影響過巨。

　    「超力駒」有過一場加眼罩的經驗，對於今場發揮有裨益，總認為其評分向來冇壓力。「快利多」唔係腳痛復出首戰，或更加睇好。

    　「豪情拍檔」夠唔夠撼靠估，只宜拖腳。「納帕二號」大閘冇走勢，點都有點顧慮。「朝東飛駒」完全冇飛，不穩先兆﹖

第11場  第二班（100-80分）1400米 草地

　　歡樂繽紛一馬獨大，往績異常準繩之輩，好成點唔使多講。「軍旗」初出展示的後勁幾恐怖，若不是一招了，加程仲好。

　    「賀喜」一向鍾意，如果落入薛廐肯打快攻，分利馬話嚟就嚟。「飛躍王子」和「三和之星」納於邊線。「戰士」前一場揀過，上場又打回原形，大冷才吼。「按得快」又係贏完而賠率好冷，唔對路。