馮諾嘉手記：富高勝冇保留

魑魅魍魉

　　今日沙田十場賽事，有兩場盃賽，沙田銀瓶同亞視盃，四大馬房蔡、方、摩、東都熱衷角逐盃賽，論近期氣勢，當然以剛憑「綠色駿威」揚威新加坡嘅方嘉柏最犀利，雖然沙田銀瓶嗰場佢冇派馬上陣，但喺亞視盃有成四匹馬參戰，睇騎師配搭似乎已有主副之分，強配柏寶嘅「競駿精英」相信會係主力，近兩仗雖冇好表現，但埋門柏寶專程為佢試泥地大閘，操足而臨，鬥志十足，練者手風又咁順，大可再度捧盃。

戶外名駒前仗水準高

　　精選場次第三場三班1400米，「戶外名駒」前仗以短馬頭位壓倒大熱門「歡樂繽紛」，爆出71倍大冷W，後駒再出再贏，證明嗰場水準高，上仗「戶外名駒」初跑1600米落敗，隨即轉投姚廐，今場強配柏寶回師贏馬路程，賽前曾試大閘，立心省招牌，做膽。「歡呼星」近仗連番入位，雖然柏寶唔騎，但動用王牌報名上陣，可見有決心，改配何澤堯有磅減，配腳首選。「多贏勁駒」愈跑愈近，上場同程後上跑第三，只係輸頭馬四分三身位，今場同樣負輕磅，要拖。「勝利飛駒」評分減到新低，田草1400米首本，回師三班，冷敲無妨。

　　第六場四班1600米，用「愛睦善」做膽，同程首本，經常跑入前列，呢場放頭馬唔多，預期步速唔會快，排九檔應會搶前爭取貼欄位置，均速馬「吉利多」抽大外檔，「愛睦善」大可跟住佢跑，形勢更有利，所以「吉利多」只能作配。上場突然跑近，只輸半個馬位嘅「喜綵」，仲有負磅超輕「創出傳奇」，都可以拖埋。

　　第十場二班1200米，馬膽「富高勝」，今季贏過兩場，近三仗雖然全部跑第二，但其中兩場只係輸少少，三歲馬評分仲有大把上升空間，用番贏馬拍檔韋達，騎者下個月要停賽兩日，實冇保留。配腳方面，「步步快」近兩場分別喺泥地同谷草1200米入位，未開齋誓不罷休，試準師田草1200米，拖腳首選。「永勝多」近四仗跑中距離全入前列，無疑1200米嫌短，但狀態當弗，有權跑得接近。「正本仁心」前次跑一班1200米都好接近，實力絕對唔弱，要兼顧。