馬主論戰

魑魅魍魉

展現大將風範

　　 告東尼剛戰憑「喜綵」贏馬，似乎馬房將會展開另一輪攻勢，我睇好佢今戰繼續有馬贏。先吼實第七場「大將風範」，經過季初一輪減分之後，前仗終於響谷草一哩重開勝門，今次告東尼繼續安排呢隻馬跑同程，論班底高過晒同場對手，話唔定可以再贏。

　　另一匹要留意嘅東廐馬係尾場「風之子」，近五場獲兩冠一亞一季，四歲馬正值大熟大勇之年，今次增程跑1200米，應該難唔到呢匹短途後上馬，排二檔起步好跑，有權食尾胡。

任達華

電訊高星必拼

　　我位多年同事Peter Wong，最近由美國羅省返咗嚟香港，今晚我將會約埋佢同一班同事齊齊入場，希望佢帶嚟好運，等我哋隻「電訊高星」贏番一場頭馬。事實上，呢隻馬出自 Danewin，長力一定冇問題，今次跑2200米可能仲啱，希望柏寶幫到佢喇。

　　另外推介第四場「百利旺」，八歲馬上場終於反彈，響谷草1200米輕鬆贏馬。今次呢隻馬再跑贏馬路程，老馬交代咗未必有人信，但睇上場贏馬姿態確係出色，有分頭不妨再追多一次。

張敬山

勁多勝繼續贏

　　剛啱大摩憑「點心」同「醉味」連捧兩盃，真係夠晒威水，今次都要繼續吼實佢手馬。最鍾意第四場「勁多勝」，雖然上場只係贏五班賽，但話晒季初曾經同「滙名燈」、「好利利」等惡馬跑近而上名，今次上番四班都唔會輸蝕，四歲馬開竅後有權再贏。

　　另外推介第五場「共同努力」，前仗響谷草一哩壓倒「贏啲啲」入Q，賽績夠晒硬淨，上場轉跑田草1600米亦跑第五，演出已漸趨穩定，今次回師谷草一哩自然唔可以睇小。

梁廷鏘