洪禮賢講馬：友利多見水即生

魑魅魍魉

　　基本上，唔使點理跑咩賽道，嚟到季尾普遍前置跑法着數，加埋今日或有兩滴雨，更加唔利追。當然，如果睇番對上兩期Ｂ欄，大致上又真係利擺前走。而泥地情況沒有兩樣，都係走得快好世界。

重心場次

第3場  第四班（60-40分）1200米　草地

　　威德妙初出跑1400米，有本事去到拉士幾十米才冇Ｐ，如果計番佢臨場既呆滯又身肥，如果唔係手上虛分多，邊有可能做得到﹔開氣後縮程，處理上更穩陣，若非9檔令其形勢差劣，又或者唔適合變化地，應可出頭。

　    「睡得好」1200米係嚴重偏短，但上場轉馬房初出在同程追得好，如加罩幫到手，可提升名次。「勝利金剛」一連兩場跑得好，尤其上場谷草Ｂ欄，沿途三至五叠尚可入Q，難度分爆燈，值得追。「上浦駿將」應該係有點前景，而剛賽陣上「生勾勾」一樣有得湧吓，博佢進度再好少少，已夠入圍。

　    「勁力寶蹄」差唔多係時候現形，尤其經上場「外遊」大敗之後，只因前次已輸近，兼且目前分數並冇阻力。「香檳歲月」初出此程楔內欄有追勢，至於剛仗之敗可歸咎於加程及「外遊」，呢次賽前做得夠工夫才動身，仲縮回此程，部署啱數。「好辣椒」和「麗晶之星」材料有限，最多爭三至五名。

第1場  新馬賽 1200米 草地

　　陽明飛飛初出臨場有揀，緣於亮相時型靚，就算當時神情普通，跑質大過天，結果入Ｑ已收貨，始終佢唔係短途種﹔跑完一場加程二百米仲好，縱外檔難跑，仍會追多次。「讚惑」又係大摩嗰類一場變身之馬，銳勢剛起唔會停。

　    「軒轅勇將」、「天外之天」目前進度差唔多，不易衝擊前兩駒，卻唔排除有Ｐ。「新三刀王」初出的表現比預期略遜，還是採取觀望。「世界大同」耐冇出，但期間準備流程冇停過，檔好有得博。

第2場  第五班（40-10分）1200米 泥地

　　快都五班着數係事實（3戰得1W2P），只可惜不論出賽或賽前試閘，出閘總是失靈，希望呢次唔好太嚴重，咁就唔難追。「金大人」情況與前駒差不多，班次有利卻唔易贏，當然，若跑得番輸畀「自家威」的水準，邊有對手贏到佢。

　    「賞心樂事」好難界定上場係咩原因令騎者去到中段「罷跑」，坐騎內閃不受控，還是再無餘力﹖﹗總之落班即換人及加配件，有手影。「實在好」之前傷過腳，但操得番一段日子，應已無礙，今場檔靚幫到手。「辣得喜」10檔驚蝕唔起。「勁駿」早前曾缺過課，未知影響有多大，計形勢則有Ｐ望。

第4場  第四班（60-40分）1200米 草地

　　勁信心入Ｑ一役的走規唔係咁好，直接顯示有分揸手，呢類未成熟之馬有欄可以跑叻好多，1檔必會事半功倍。「勁高手」初出在劣勢下可爆一段，又係四班過客一名，加程有好冇壞。

　    「勁辣椒」唔放唔得，排4檔有幫助。「電訊巨星」上次有揀，對比今次雖然加了磅，仲要排外檔，睇真啲，對手唔係好多，未必唔可以再上名。

    　「普渡馗」試閘走勢唔錯，貨源亦信得過，初出或會接近。「萬人迷」長期跑得近而唔入三甲。「錫山」和「覓得寶」邊線馬。

第5場  第三班（80-60分）2000米 草地

　　印度光輝132磅幾吃力，要贏唔易，加上初跑此程，勝任與否要博，尊重其近績才秤先。「威武雄星」休出後連跑3場終加程，目標在此，用埋柏寶更似樣（人馬6次合作俱有獎金）。

    　「衝勁直前」地慢及輕磅，有權改寫戰果。「頭盤」上場贏來唔使點講究走位，只加6分有賺。「大紫荊」跑到上場初次見識到佢嘅貫注力，係地淋還是已適應，今次會有進一步了解。「危險英駿」場地唔快，唔到佢惡。「首騎警」未敢太早死心，因唔知點解上場跑得特別差，再之前嘅演出其實上緊，遇冷拖多一次。

第6場  第四班（60-40分）1650米 泥地

　　天寶之威一日未斷纜，依然要高度重視，尤其今場預計有正常偏快的步速，實啱佢追。「八發八中」肯集中火力跑泥地一哩，總有出頭天，而話晒上場可緊隨前駒過終點，在此夠卡士。

　    「飲水思源」剛仗究竟係想放，抑或被迫帶頭，應是後者吧，但輸得不遠算叻，似乎跑跑吓狀態返嚟。「馬有成」賽事形勢如利後上馬，開正佢嗰瓣。「威猛情人」落番四班，可能即刻變身。「愛拚者勝」9檔及轉場，唔係冇變數。「歡騰」評分太着數，只是腳傷問題打窒信心。

第7場  第四班（65-40分）1400米 草地

　　聖河不用理會近績，只管知道班次唔同，競爭力隨之返嚟，而檔好唔難於早段泊位，跑得番肉搏「沙貝利」水準，邊有對手鍊得贏佢﹗

    　「較量」已貼了兩次，論演出稍比預期失色，不過跑番此程會好過1600米。

　    「中國心」如果上場唔係拉士在馬林綁手綁腳，好大機會衝到入Ｐ，今次跑低半班又轉到此程，條件仲正。「軍士」四班此程中堅，只怕地淋唔知得唔得﹖「高升」及「傑出君子」可納入Ｔ或Ｆ配腳。

第8場  本地一級賽 2400米 草地

　　爆冷連續4屆在此錦標上陣，最差都入Ｑ，仲要當年係遠征返嚟，即係話正常情況下，跑到咁長，冇馬可以撼到佢。

    　「極品絲綢」四歲已有能力在女皇盃入Ｐ，唔係簡單，雖則2400米唔會考起佢，但初跑就係初跑，未必即刻贏到前駒。

　    「至勇威龍」及「家家興旺」如地慢，後駒會秤先。「好先生」回了兩場氣，或者今場又會跑番好。

第9場  第三班（80-60分）1200米 草地

　　友利多唔信唔信又一場，唔信唔信又入Ｑ，如這次遇到變化地，有埋1檔之助，隨時贏得。「開心自在」外地跑4場，全部唔係正常場地，所以慢地仲啱，但重磅則唔會冇影響。

　    「風動寶」賽績好靚，只擔心退出過，影響進度有幾大。「輕輕鬆鬆」唔鍾意上場的演繹手法，換人可跟多一次。「新蝦王」和「心中有勁」唔係大外檔應會納入考慮之列﹔「戰河」情況差唔多，不過講到前景可能好得多。

第10場  第三班（80-60分）1600米 草地

　　曬冷王陣上展示出進步的成果，而大摩等到隻馬夠跑頭終加程，意味着想交代。「騰雲駕霧」近績穩紮穩打，正路配腳。

    　「威騰駒」上場跑到一絕都贏唔到，呢次13檔真係要睇際遇。「十則圍之」勿以為加程至1600米的效果唔好，因上場成條直路困死了。

　    「超勁精神」打水戰最開心。「海力童」及「馬主精英」可爭三至五名。

第11場  第二班（100-80分）1600米 草地

　　卓爾非凡縮回此程好過跑長途，黏地曾入Ｑ，唔怕場地起變化。「正毅」一而再於大閘有走勢，唔好蝦佢耐冇出。

　　「非常好」賽績穩定證明漸漸適應，同埋馬重唔跌係佳兆。「貝利高」慢地不易突破。「零距離」情況則相反。「鎗臣」變化地性能未明，論跑法有可能於今場賺形勢，冷門可敲。