馮諾嘉手記：威德妙試準而臨

魑魅魍魉

　　早前韋達停賽兩日，柏寶無乘機連場數胡，期間只係贏得一匹「歡呼星」，近期柏寶騎嘅馬經常被過分熱捧，例如多年不勝的「旺國手」及處女馬「極速寶寶」，賠率熱辣辣，已經唔值搏，再加上柏寶胯下多匹實力馬出慢緩閘、走位欠佳，已惹來部分馬迷不滿，剛戰更食白果，唔知與壓力大有冇關﹖

　　　但無論如何韋達已經進一步追近，前個賽日起孖後，剛戰又憑「金獅猛將」同「盈彩繽紛」再接再厲，頭馬數字已經慢慢增加到82場，距離榜首嘅柏寶只有四場，呢兩大騎師今季鬥爭得好激烈，真係未到收鑼未知勝負，韋達會否峰迥路轉，最後殺柏寶措手不及呢﹗大家要拭目以待了。

　　禮拜三端午節沙田有十一場賽事，賽後轉播威爾斯親王錦標，而禮拜二晚又會轉播英國皇席錦標等四場賽事，賽事接踵而至。本地賽今日排位，初步心水馬是角逐四班1200米的「威德妙」，呢匹相信會係韋達爭分籌碼，固然會好好把握，牠前仗初出跑1400米，臨場只有18倍，初出已經有唔少捧場客，結果喺賴維銘胯下跑近，只負兩乘多，雖然只得梗頸四，但相信表現已令捧場客收貨。上場即刻回配韋達，並縮程跑1200米，當日跑黏地，該場三甲馬全部係出閘即擺前走，後上馬全部無得追，「威德妙」擺前無疑有着數，可惜最終仍不敵「勝利金剛」，只以頸位僅敗未能贏馬開齋，今場乘勇再戰1200米，練者一定認為暫時來講以此程最合適，試準並操足而臨，定必想盡快打開勝利之門。