馬主論戰

魑魅魍魉

勝利飛駒回勇

　　季尾馬一向唔易賭，揀一啲有分頭嘅馬輕注怡情，應該冇錯。先推介第十場「勝利飛駒」，九歲馬近期有回勇迹象，連續兩仗響1400米追入第五，睇嚟評分已經減到咁上下，今次增程跑1600米，同場有唔少名氣馬，肯定備受忽視，值得一敲。

　　另外第六場「錫山」都有留意價值，季初試過響田草1200米跑近「高風格」、「成功網絡」上名，證明有一定質素，上場唞近八個月復出，輸得遠亦唔可以作準，熱身後小心今場即刻現真身。

（任達華）

電訊巨星博冷

　　我哋今日有兩隻馬上陣，計機會第七場嘅「電訊巨星」會高啲，話晒前仗先贏過「漸信良駒」，今次兩駒再遇唔一定冇得鍊，有分頭可以諗吓。至於「電訊超星」似乎進度仲未夠，仍要跑多啲攞經驗。

　　其他心水，第三場隻「希望之星」我一直跟開，近兩仗擺前走表現其實唔算曳，今次終於等到佢落班，一定要追多次。至於第五場隻「八發八中」，上次能夠跑贏「歡騰」入Q，實力唔簡單，今次對手唔算太強，睇嚟都係時候贏番一場。

（張敬山）

霹靂槍①定搏

　　上次我哋隻「霹靂槍」（圖）對住實力超班嘅「川河勁駒」，輸咗亦無話可說，今次呢隻馬再上陣，雖然同場都有唔少惡馬，但就有運抽到一檔起步，如果早段可以貼欄放出，唔一定冇機會爭，希望可以響煞科前拉番場頭馬喇﹗

　　另外鍾意第八場「火龍駒」，前仗贏田草1800米姿態好輕鬆，上場若非直路走勢欠規矩，早已經再入凱旋門。今次大摩吼準社群盃先幫呢隻馬報名，擺明有心想攞威，長途馬跑2000米肯定更啱發揮，一於吼實佢。

（梁廷鏘）