洪禮賢講馬：安鞍升班冇有怕

魑魅魍魉

　　呢期上親馬會網頁，總會有眨吓眨吓的相片吸引目光，除了關於煞科的活動之外，就係騎師冠軍之爭嘅新聞，仲要係兩邊都係爭得好激烈，大師傅就係韋達同柏寶，小將則呈現混戰之局，楊明綸、蔡明紹、蘇狄雄及梁家俊等四人，相差最大只係講緊3場頭馬，是但一個有運的話，隨時一期賽事就令整個形勢唔同晒。
　　
　　講開韋、柏二人，姑勿論誰勝誰負，二人的競逐過程真係好睇過戲，季中階段以為柏寶贏面九成，除了因一度拋甩16場W之外，加上韋達又一再停賽，以為冇得追，點知後者打出一段12﹕0的攻勢，此刻反過來贏多兩W，現時剩下一田一谷賽期，唔係話冇得追，之但係，只要睇睇今期蔡約翰攞批咩馬出嚟關照韋達，就知撐到行晒，又係贏三兩場好正常﹗

韋蔡配實力強
　　
　　呢期蔡、韋有6駒合作，牌面到唔牌面嘅至少3、4駒，如果贏唔到幾W，我諗到時啲熱門客下場都幾慘烈。而睇番那堆牌面馬，「安鞍」冧莊機會好高吓，上場初出已經揀佢，始終試大閘有好走勢，外地績又唔錯，只係估唔到可以贏得咁遠，當然，轉直路彎無故內欄騰出空位畀佢衝，連形勢都賺晒，也是大勝的因素，但在黏軟地造到1.23.15，的確唔簡單，加12分並唔重手﹔雖則升到二班，磅位還增加，條件好似唔多着數，睇真啲呢棚對手，除了「得到寶」之外，冇一駒季內贏過二班賽，水準叻極有限，所以，面對阻力唔慌大，有埋一檔仲正，篤定連捷。