高清睇跑馬：共創未來唔怕外檔

魑魅魍魉

　　今季總場次714田草四班1200米，「錫山」出閘欠佳，且因十二檔起步，賴維銘選擇留後，甚至刻意走出三叠，尚幸愈跑愈順，轉彎中段已進佔馬群中間，未受催策下馬匹已自動波追前，直至入正直路才推騎，由於沿途走三叠蝕位不少，轉直路彎抄出最外檔更不利，直路初衝刺未算強，然而跑至二百米之後撻着，以全場最快末段趕過「勝利金剛」殺入亞軍，當時大雨滂沱，更見水準極高。周日之戰預期場地正常，舊路重遊可期打開勝利之門。
　　
　　另於季內總場次669田草二班1400米，「共創未來」十三檔起步迅速，然而被白德民緊韁捉實，讓其他馬領放，但跑多二百米騎者卻輕輕鬆韁，坐騎因而走出三叠冇遮檔，入直路一樣衝刺凌厲，一度越過快放的「愛跑得」，但對手鬥心實在強，且全程貼欄跑一步不蝕，而「共創未來」則沿途蝕位，最後未能貫注到底而僅敗，失望是失望，但考慮到白德民發揮非佳，加上頭馬「愛跑得」再出繼續上名，季軍「清風送爽」及殿軍「披星載月」再戰俱有好表現，都足以證明「共創未來」實力強。汲取上賽教訓，今次再戰1400米仍排外檔亦冇有怕，白德民應懂得如何收復前失。　

Sam