洪禮賢講馬：清風駒轉場啱數

魑魅魍魉

　　來到田草煞科戰，焦點依然會係韋達和柏寶，但睇見近期相繼有部分騎師仍可喼住攞到好成績，所以，不宜過分聚焦在兩大巨頭身上，一切都係以賠率及馬匹能力作據為妙。至於心水對象，則以馬偉昌和普萊西較啱眼緣。

重心場次

第10場  第三班（75-55分）1600米

　　闊袍大袖加程的步伐處理得穩陣，連跑兩場短途在先，到了上賽終肯上1400米，結果在不利追的情況下一樣爆到入三甲，仲要該役係強組賽事（冠亞殿軍再出冇Ｗ有Ｐ），此外，賽前行圈時馬兒的情緒其實未收斂，所以，這個季軍甚有指標性﹔今場上1600米，預期會比1400米更大威力，因外地也在此程攞Ｗ，只要臨場冇忟憎，情緒對辦，有望出頭。

    「一言為定」上場閘前情緒波動，加上陣中有阻塞，地慢又唔啱（仲未計升班和轉程），最終有第四已算本事﹔希望有了一場實戰適應，跑得番預期水準。

    「威騰駒」及「天瞳」此程有往績支持，只係賠率過冷而已。「千江映月」初上1600米或會更啱追，亦又可能要一場去適應。「活力奔騰」落地唔係耐，但論進度唔算差，初出或即可有走勢。

第1場  第四班（60-40分）1200米

　　普渡馗首仗幾乎贏埋，翌仗則由出閘錯到尾，賽績出現波動性唔使介意﹔跑番正常場地，排位又唔係曳，條件即刻唔同晒。「一路奇兵」一千磅唔夠，能否應付到132磅的負荷，其實真係靠估，尊重佢贏開才作配。

    「肥仔糖」初出「生勾勾」照贏，或許淋地特別叻，又或是太多分在手，總之，計負磅死數，呢次仍賺緊。「甜蜜至上」接連在同程入三甲，尤以剛仗在內欄啜腳地也衝得好，唔係冇難度，跑番正常場地，唔會冇得爭。

第2場  第四班（60-40分）1200米

　　勁高手轉1200米即現形，如果唔係遲遲才撻得着，未必只得第三名﹔希望來到第三回合，本身跑法及性能進一步熟練，便可出頭。「錫山」之前耐冇出，上賽行圈似碌木，依然有本事入Ｑ，冇理由唔追。

    「綠茵勁贏」對上場只得第六係失望，唯一有得賴就係直路賽唔多啱，跑番最有根據路程，畀多次機會。「小蜜蜂」漸漸冇咁搶口，唔排除場地正常更啱佢發揮。「神州八號」轉馬房後承接住做嘢，進展冇受影響。「錢照贏」驚前快後慢。「光芒四射」路程太短。

第3場  第四班（60-40分）1400米

　　清風駒現時一哩或許嫌長，此程則可能啱啱好，同埋，希望柏寶經過上場操之過急的演繹，今場在留放上做番啱，苟如是，應可突破。「精英財星」兩仗前入Ｑ一役才是實力指標，對上兩場則可抹去，呢次轉人及排到內檔，應該唔同晒。

　　「旅遊大亨」冇痰冇傷的話，其實在四班就算重磅也不怕，但更重要都係今場在處理上唔好似剛賽咁漫不經心，苟如是，冇咩對手後勁會好過佢。「上浦駿將」總認為進度上已比前好，終於跑番一場好地，十幾倍點解唔博。

第4場  第二班（95-75分）1600米

　　安鞍超班馬遇上夢幻形勢，上場唔大勝才怪，當然，今次轉程禍福難料，好在尚有1檔，就算一時未適應到，或可慳埋慳埋入到Ｐ。「卓爾非凡」正常情況下，在此班跑草地中程值班頂水平。

　　「戶外名駒」好懷疑連敗係咪只因地爛關係，但如果唔係，又好難解釋到點解跑唔番打低「歡樂繽紛」水準，呢次路程、場地及配件均有唔同，或是變身的引子。「快樂小子」兩仗的發揮，用「礙眼」兩字已形容晒，肯加程唔應該冇鬥志。

第5場  第五班（40-0分）1400米

　　驕陽飛駒上仗際遇幾差，如慢閘、受妨礙及被動，但尚有殿軍幾意外，伸算跑番草地，如整體發揮冇咁失利，有權入圍。「極速寶寶」成日湧到一段，但往往係三至五名，拖腳唔反對。

    　「快馬當先」體重升番係好事，而上場直路近乎發緊夢的演繹也輸得近，忽然換人有得博。「創先機」只要唔係臨場情緒有問題，在此程甚有殺傷力。「奪寶群英」分數真係太着數﹔「颯若風」亦有同感，有賠率可拖一注作保險。

第6場  第四班（60-40分）1600米

　　漸信良駒加磅加程唔係冇壓力，好在本身略有級數，或可克服到。「吉利多」跑法或在今場受惠。

　　「歡樂寶寶」三歲仔未定性，現時在跑姿方面仍有待改善，但既可一再上名，能力可恃。「陸豐福星」剛仗入Ｐ的水準真係有啲懷疑。「按得醒」難度加大了，要睇進度追唔追到﹖﹗。

第7場  第三班（75-55分）1400米

　　人人興旺初出走勢比預期還好，開氣後上1400米啱數，而對手又弱咗，唔難爭入前列。「寶貝王子」上次臨場畀佢外觀吸引到，亮相時真係好神氣，希望搏完一場唔會冇晒力。

　　「較量」慢步速的形勢未必在今場再發生。「飛躍之旅」如果再發揮到上賽拉士的爆炸力，呢場前中段或會快，啱晒佢。「傳奇快車」情況近似。「福將臨門」跑法或因排了外檔而有好大影響。

第8場  第一班（115-95分）1600米

　　競駿精英及「喜聚寶」一對馬過百一分，既有級數，路程性能亦有晒根據，或不分正副，齊齊出擊。

　　「醉味」此程能撼贏前駒，只負中磅仍有優勢。「金獅威將」早段如非太慢，或有機會湧入三甲。「安御」置身115分上限的一班賽，其實已有壓力。「好德煌」也有同感。「魄力寶」此程的性能的確勉強。

第9場  第三班（80-60分）1200米

　　川河勁駒兩出未輸過，如果唔係130磅令佢發揮唔到（或兩Ｗ後體力不勝負荷），唔應該有阻力。「金堡龍華」上場有貼，只因前仗路長也有追勢，勝後肯叠埋心水再跑此程，正路之選。

　　「活力至寶」返番田草，冇咁易受到檔位大抽獎的影響。「中國心」長期以百一磅以下的優勢偷襲。「輕輕鬆鬆」放與不放，對發揮有着好大影響。「開心老友」試大閘留下唔錯印象，可小注一試。

第11場  第二班（95-75分）1400米

　　虎虎生輝現時又唔係唔放唔得，跑法上有兩手準備，預期威力可翻一番，若夠氣量應付此程，唔難上名。「共創未來」直落幾場入圍，立心搏到贏為止，鬥志好明顯。

　　「紅日」上場末段時間好犀利，跑高半班只負115磅，未必下風。「永勝多」路程專家﹔「貝利高」有卡士，邊線腳。「如日方中」唔係排外檔會拖。「開心」及「賞惑」近仗太差。