馮諾嘉手記：恉大歡喜靠得住

魑魅魍魉

　　今晚谷草煞科賽，剩番嘅人馬獎項，如冠軍騎師、冠軍見習生、最大進步馬匹獎同拍賣馬狀元今晚至有結果，最緊張當然係冠軍騎師之爭，賽前韋達只係多柏寶兩場頭馬，就算最終大家頭馬數目一樣，仲要計埋亞軍，呢方面韋達都係壓住柏寶，即係話柏寶今晚最少要有三場頭馬，先至有機會坐上冠軍騎師寶座，當然有一定難度。睇番佢哋今次手馬，柏寶要反先唔係冇可能，奇怪嘅係嚟到關鍵時刻韋達胯下只得五匹馬，柏寶就有成七匹坐騎，仲多數有一定勝算，隨時可以後來居上。

大進勝望濃

　　方嘉柏將第六場機會好大嘅「大進」交畀柏寶操刀，但一場W唔夠，柏寶仲要靠其他馬，例如第二場四班1650米嘅「及時雨」，雖然在港四戰未入過三甲，但前次喺四班田草1400米跑近，上場回師谷草只係跑嫌短嘅1200米， 呢場跑1650米係試準而臨，抽到三檔，係柏寶坐騎中嘅餐士馬之一，要贏冠軍就要好好把握機會，睇吓呢匹馬係咪真係成為佢嘅及時雨。呢場對手非強，配腳先揀「創新高」，季內贏過呢程，近仗亦跑近。其次係「奔騰飛駒」，上場喺田草1400米跑第二，在港未開齋當然想作零的突破，最後係大前仗贏田草1600米嘅「高歡」。

　　第三場四班1200米，用「皆大歡喜」做膽，季內已經四度獲亞軍，次次輸短距離，證明演出可靠而欠運，馬房為求交代實搏。配腳方面，「贏啲啲」近六仗唔贏都有位置，配腳首選。「長勝福將」上場落班跑田草1000米突然跑近，九歲馬今次作最後一擊，要拖。「亞洲橙王」抽到黃金一檔，亦可兼顧。

　　第八場一班1200米，「美猴王」係韋達嘅餐士馬，所以話韋達同柏寶有機會鬥到最後一場，呢匹馬谷草1200米表現突出，只係前次喺柏寶胯下走內欄塞車致敗，馬主同練馬師喺關鍵時刻支持韋達，隨時令冠軍騎師之爭出現峰迴路轉嘅結局。但係柏寶亦有方嘉柏提供嘅「開心風采」，睇吓喺方廐福地作賽係咪零舍醒。拖埋上場同程獲亞軍嘅「龍武軍」同近態回勇嘅「威騰」。