洪禮賢講馬 YIN''''S TALK：好開始≠好結局

魑魅魍魉

　　好嘅開始，未必有好結局；壞嘅開始，結局或會更差。呢兩句說話拉落邊度亦管用。像情侶嘛，因了解而結合，因誤會而分開。又可能因彼此性格火爆臭味相投，而最終分手原因係打穿對方個頭。馬匹又點呢？初出即刻跑得好，可能係前途無限的先兆，亦唔排除往後會停止進步，基本上一日未到最後揭盎，唔會有任何保證。

天嘉一世難忘

　　好記得從前有隻馬叫「天嘉」，點解佢仍佔有我腦袋記憶體，原因係嗰時初初入行，對好些賽駒特別有印象，何況佢係比經典更經典的老牌處女馬嘛。此外，當年告東尼曾經騎過，咦！點解鬥足一條直路都輸畀嗰隻「金鑰匙」嘅？冇理由Tony輸得畀嗰個唔識笑嘅新人（ 高雅志）！就係因為呢兩點，就算事隔多年，仍覺是昨天的事。

　　事實上， 誇張啲講，「天嘉」真係悲劇英雄，呢匹新西蘭PP，首季跑一場得殿軍，第二季一出已經在一二班入Ｑ，呢匹仲唔係大賽棋子？！只可惜，自此役之後，就算多跑 4個馬季，往往與頭馬擦身而過，加眼罩又或者防沙眼罩都冇用，轉馬房亦轉唔到運，扳到告東尼、馬佳善、巫斯義及史卓棟等大內高手都束手無策，跑田草、谷草，短途、長途都無濟於事，在晚年甚至乎膠地、泥地照殺也徒然，成就都係止於阿二（服役以來9亞6季）。所以，好嘅開始，未必有好結局，呢句說話形容佢，好「到」呀！