洪禮賢講馬YIN''''S TALK：賽馬世界沒有不可能

博彩老头

　　有時追蹤目標馬之時，各人或有唔同見解，以及自定的規範，譬如筆者可能會待至Ａ 駒落班才捧場，Ｂ駒如果值博率不足便忍手，Ｃ駒一定要跑1400米，Ｄ駒要用硬功大師傅幫手云云。但同一批馬在他人眼中， 對待態度會完全不同， 只因大家心中把尺不一，有機會係.....Ａ駒落班要負重，所以你唔買；Ｂ駒捧到兩倍，你覺得愈熱愈穩；Ｃ駒角逐1600米，你認為仲好追；Ｄ駒搵牌仔孭輕幾磅仲好等等。

超力好蝦人買
　
　　就以上述4項唔同因素之中，等唔等馬匹落班，周不時你與我都會計錯數，每一季在降班邊緣分數勝出之馬，數量不多但也不算少，隨便舉個例子如「超力好」，上季在四班40分贏馬之前，連跑9場都冇P，雖則當中唔係清一色跑主項谷草1650米，夾雜了短途和田草，但就喺40分可落班之役，便由田草 1400米轉番跑主項，都唔寧願等落班，我想，當時唔會人人諗到佢會恃住超輕磅郁手，而該役佢以輕鬆姿態放甩及後屢獲佳績的「天寶之威」和「永得勝」，賽後真係嘆句：「以為等降班，原來大超班！」

　　講開「超力好」，贏完那役，就算係高水準頭馬，之但係，佢之前4季都未試過打叠上名， 諗住贏完就失蹤，但真係估佢唔到，踏入老年才盡破多年的宿命，有本事勝完再勝。其他例子仲有「聚豪精英」，上季評40分唔落五班跑，結果就喺王志偉胯下出冷。所以，賽馬世界，Never　say　never！