洪禮賢講馬：賽馬偶像化有好處

猪拉多纳

　　偶像化不是藝能界的獨有產品，凡是體育活動，fans群組都會存在，踢波嘅可能欣賞C朗；鍾意打golf，可能迷上Tiger Woods，懶理佢有幾耐冇喺公開賽贏過，至此仍然霸住排名榜第一位。喜歡睇籃球，多數人記得米高佐敦，呢位籃球之神，入股山貓做班主之後嘅成績，唔會影響佢作為籃球icon的形象，因為佢當年在NBA的風頭（除了冠軍指環，梗係要數埋波鞋），可以話席捲成個銀河系。

　　咁，賽馬世界又點，邊個會係騎師之王i c o n？在此地的50 至70後，對於摩加利、告東尼、魏德禮、雷誠、馬佳善等等（其實仲有好多騎師冇講），或視他們為偶像，何人係騎師之王，則肯定各有擁躉，睇法唔會一致，唔似得籃球界咁，相信幾難會搵到一個共識。

　　就攞馬佳善嚟講，初期睇佢跑馬，騎姿唔會有幾多馬友鍾意啩！？喺鞍上企得又高、推騎動作又獨特，好記得那個年頭，大多的電視評述員，初期都話佢嘅騎姿阻風，到頭來，做咗幾屆冠軍騎師，馬王如「翠河」、「活力先生」，統統喺佢胯下大放光芒。

　　其實唔理大家有冇偶像都好（嗰日邊個帶挈贏錢，咪封佢做偶像亦得）， 據了解， 部分喜歡賽馬的fans，尤其「馬齡」較年青一群，普遍會有自己心目中英雄，而佢哋通常會用欣賞角度嚟睇，唔係得ＷＱＴ。呢類馬友，從咁嘅方向出發，除了襟睇啲之外，亦冇咁易因金錢上的損失而同賽馬講b y e -bye。