洪禮賢講馬：友利多賀柏有動靜

港陌

　　根據對上4季賀廐首W嘅日期，通常都唔會遲，好多時喺頭三兩期就開到齋，像去季此廐第1場頭馬「順利多」，總場次係002，前一季嘅「天澤」，才不過該季第三期賽事，由此可知，某程度上賀賢也崇尚早贏早着，免得夜長夢多，到時搏極都開唔到齋嘅話，真係唔衰攞嚟衰。

評分來港新低

　　開鑼日賀廐報得兩隻咁大把，「風火神駒」和「友利多」，前駒的機會如何，同文珊翠絲已講得一清二楚，唔使亦唔輪到我講嘞，還是講講後駒吧。

　　論評分，「友利多」已是來港多季以來最低了，落到四班唔使等淋地，應該都夠爭，話晒之前仲喺三班上緊名，話就話係上季賽績，實情都係近幾場賽事而已，斷唔會經過一個咁短嘅暑期後，忽然玩急劇退化啩？！

　　講到速度方面，此駒喺四班應該夠用有凸，而對上兩季初出不脫前四名，似乎休出有點把握。

　　此外，周一朝早見到柏寶，企喺隧道口欄邊等咗「友利多」好耐，先至有得出試，操完又同練者傾咗一大輪， 動態唔係冇，值得記存。