開鑼倒數4日：馬場潮人潮語迎開季 杜利萊騎得又打得

博彩老头

　　香港不少男女均追求瘦身，至於眾多騎練中，法國騎師杜利萊稱得上是運動家一名，除馳騁綠茵場外，他更開設拳館，平日喜愛打泰拳及詠春喼弗！

　　法國人予人印象斯文及較慢熱，上季杜利萊亦戰至十月中才開齋，可能馬迷會覺得今季初不宜高估其坐騎，但如有此看法卻大錯特錯。杜利萊近五季開鑼賽成績不差，如05及08年便分別憑「駕進」及「幸運駿駒」開齋，07年開鑼戰若非「財寶天王」輸短頭跑第二，成績應更出色哩！

季初分秒必爭

　　雖然唞暑時間不足，但杜利萊卻早在8月7日已復課，乃眾多洋將中最早開操一人。對比起近五季均遲至8月20日或以後才復課，可見騎者今季積極得多；另外，晨課時亦經常見他跟不同練者打交道，顯然正努力爭取支持，其中上季鄭俊偉跟杜利萊合作十八次得三冠一亞一季，成績不俗，而此對騎練據悉將在開鑼日合作「分秒必爭」，既然此駒前季一出跑第二， 周日報爭唯一勝途1400米，當然要吼實。

喜上網做功課

　　除了打泰拳外，杜利萊亦有靜下來的一刻，如晨課於烽火台休息時，便不時見他登入馬會網頁，翻查馬匹資料預先「做功課」，希望收到知己知彼之效；做事如此細心，難怪在港一直交出穩定成績！

馬場潮語知多啲

【打吡】源自英國葉森打吡，各國打吡的途程及賽制不盡相同，一般只供三歲馬參加，但香港打吡則只讓四歲馬上陣。

【步頭】形容馬匹的出腳狀況， 例如步頭暢順或步頭有力。

【飄口】指馬匹韁口太敏感，韁繩難以操控。