洪禮賢講馬：上浦駿將開鑼日攞威

博彩老头

　　回顧對上3季開鑼日嘅成績，普遍有好成績都係大馬房，呢點好合邏輯亦唔難理解，堂堂大倉唔喺首回合交吓差，邊有聲勢，邊有牙力去吸納新血，所以，部分大馬房如告東尼、大摩、蔡約翰等等，近季先後喺首日贏三兩場W，完全係正常現象。引申到中小型馬房要分一杯羹，的確唔容易，更甚者，當日攞到個P，可能已經係超額完成。咁呢次會有邊啲倉口可作出突破，或許呂健威馬房會有咁嘅本事。

　　其實呂廐並唔算中小型馬房，規模唔細，目前養馬量在50駒以上，而呢期出馬唔多，只得兩件「天之驕子」及「上浦駿將」，但講到機會都唔錯，或可帶挈廐主起個孖，為近季開鑼的平淡勢頭，開闢新一頁。

　　而呢對馬在上季尾個人皆有捧場，結果一得一失，雖然「上浦駿將」冇帶來利潤，跑到第四名總算ok，因當時已指出，賽績真係曳到不堪（未跑 11/7之前嘅賽績），但好多場皆有借口原諒，唔係成熟不足，就係場地影響，根本未真正露過一手，至於最後一役那席殿軍，正正顯示到本身唔係冇能力（唔係斜跑必有P）。只要隔了一個暑假走規轉佳，在五班要出頭，邊有難度！