借題發揮：韋達首回合唔似big day 賞惑半冷抵玩

博彩老头

　　10 屆冠軍騎師韋達，上季尾一度以為衛冕之路夢碎，點知柏寶挨近尾聲經常失靈，結果以一場頭馬之微，繼續屈居做二哥。今季形勢又如何，其實往往千篇一律，韋、柏兩大巨擘以外，好難搵到第三個是誰，暫時唔覺會出現鼎足的局面。曾經好多人認為蔡明紹會做得到，但Jack估計最快都唔會喺呢一兩季發生，一切有待此子進入成熟期，才有機會成事。

　　至於韋達，開鑼日坐騎卜滿，驟眼看來整體嘅上陣馬唔錯，但有冇咁筍，即刻振振聲威，可能係馬迷們的樂觀主義而已，尤其唞暑之後，大家對賽馬有着一股熱誠，未必咁心水清，太過樂觀去度馬，唔會係好事。

　　事實上，唔睇猶自可，原來對上幾季，韋冠軍在開鑼日嘅成績唔算風光，上季冚晒旗，再之前兩季贏咗3場頭馬，無論係長捧又好，或者平衡注碼捧佢場，都係冇乜好下場。

　　只要大家細心睇吓佢今期嘅馬，其實好多都係有缺點，但又唔慌會冷得去邊先慘，在值博率唔高情況下，要博真係唔多划算！一定硬住頭皮揀，「賞惑」嘅機會可能猶在「勁高手」和「旅英駿駒」之上。總之，筆者唔係悲觀，但要吼韋達嘅big day，來日方長啊。 　

Jack