洪禮賢講馬：重心野馬顯著見好

港陌

　　天氣唔穩定，隨時跑跑吓又落大雨，場地唔慌快得去邊，而草地採用C+3欄，地淋或更不利追； 泥地在季初階段， 唔使旨意會啱後上馬發揮，貼欄及擺前走係不二法門，檔好之馬尤為秤先。

重心場次

第8場　三班（85-60分）1200米泥地

　　「多歡騰」外地曾勝膠沙地，結合來港後多次在泥閘跑得好，轉田泥發展啱數。由於速度可靠，3檔起步夾晒，加上暑後進度嚟得好，應該一出即拼。

　　「勁飛馳」毫無疑問，跑法好蝕底，但在三班唔使負重，真係筍，唔期望可後上劏晒，如果唔係完全冇得追，唔排除有Ｐ。

　　「聖迪達」向以準繩見稱，只可惜霍廐在季初頭兩回，上陣馬見靚都係死火居多，加上賠率過熱，只宜作配。「寶貝」三班如跑草地可能下風到痺，但泥地則未必，再者，跑法主動、2檔及磅輕，增強不少威力。「神殿」三班Ａ組處境尷尬。「自家威」11檔兼撞正埋邊多馬走，形勢不利。「新強勁」係最睇唔透，泥地有底而檔好，大冷可拖。

第1場　第五班（40-15分）1000米草地

　　「野馬」今季在心智方面有明顯唔同，試跑時情緒專注得多，推算威力將倍數升級，如果地淋，採取主動或更有效益。

　　「你好我好」傷患底好厚，但今季做得嘢，亦可以講得係做好晒先安排上陣，今場唔會冇決心。「瀟洒靚龍」及「東方駿馬」一隻熱完身會跑高多少，另一隻則冇以前咁急，可能變到身。「賞心樂事」埋門拍親都sharp醒，陣上係冇證明過，不妨先博一注。

第2場　第四班（60-40分）1400米草地

　　「陸豐福星」轉馬房後冇錫住佢，工夫有一定壓迫性，而兩課大閘試來討好。只要陣上岳頭毛病真係攪掂，在此班中程變化地，一定吃得開。

　　「尚感」馬仔細細，比較易操起，地慢更開正佢嗰瓣。「南洋望族」之前試跑還覺力度有點牽強，到埋門則略進。「信賴」對住呢批班內水皮之馬，唔夠水準也可爭。

第3場　第四班（60-40分）1000米草地

　　「太極至尊」進度未去到好滿意之境，但以佢嘅卡士八九成馬，已經夠爭有餘。「肥仔糖」眾人皆知有質素，問題係唔知臨場會唔會又發老脾。

　　「皇仁勁駒」早課見毛色暗啞，唔算做好多嘢嚟跑，但正因為咁，呢匹稍有前景之馬，先博到賠率。「辣得喜」復課承接到上季尾兩Ｗ的勢頭。「父子兵」size唔係細，擔心首仗未起得夠。「宇宙良駒」和「最上」信心談不上，卻有入圍可能。

第4場　第五班（40-15分）1600米草地

　　「濰坊」如果唔係退化大，以目前狀態，要在五班爭成績唔難，再講，經常在季初跑得好，打得王牌，有心出擊。「萬子千紅」今季脾氣有明顯唔同，而大閘及試閘同樣走勢吸引，變身唔奇。

　　「浪漫添馬」重磅及外檔有影響，但級數比大部分對手優勝。「兄弟班」唔係驚慢閘，應是爭勝主角之一。「馬霸龍」及「駕世鞍」勿因賠率太冷而輕視，買三Ｔ，要兼顧。

第5場　第四班（60-40分）1200米泥地

　　「八發八中」有埋大閘安排，帶出練者唔會打冇把握嘅仗，而現時在四班已不用負重，的確着數。「中華英雄」降番四班，唔使再坐馬監，減多幾磅嚟跑仲惡。

　　「實業輝煌」老了，但加罩及檔好，唔係冇變數。「威馬加鞭」仍覺身型未修得好。「京城孖寶」評分在落班邊緣，要睇練者心態。

第6場　第四班（60-40分）1400米草地

　　「吉利多」首仗跑得好，來到第二仗應更銳，排內檔夾到跑法，應可補中。「標青」重磅不易贏，但跑法和1檔會好有幫助。

　　「魅力心」復課初期好躁，惟多操之下，明顯洩了火，論能力不比前駒差，防出冷。「幸運相架」9檔令早段所處位置未必好。「聚有盈」地淋會啱，跑法靠檻，3檔應好。「天外之天」唔覺暑期之後出現多大變化。

第7場　第三班（80-60分）1000米草地

　　「小橋流水」短途明星，唔會未夠態就貿貿然攞出嚟跑，又睇吓今場點表演。「牛精巨星」試大閘快，試草地亦然，但卻唔覺係躁，來到第二季漸漸適應環境。

　「金鑽龍華」打叠報埋下周三谷戰，目標在哪？但忠心馬，經常八成跑十足。「軍刀」唔介意係延遲報名身分，雖然直路賽係短，但狀態不錯，要博賠率就在今場。「軍策令」不及上季銳，且看地利幫幾多。

第9場　第三班（80-60分）1400米草地

　　「傑出君子」淋地中正下懷，來到埋門拍親都靚，進度起得好，就算感覺唔夠班，都未必冇得爭。「大家開心」休出叻到痺，跑法進取，外檔也不怕。

　　「寶利多」班次可能掹掹緊，但態況唔錯。「活力奔騰」跑埋今場，可能先會到位。「綠色超凡」趕工夫，進展合格。「發達心聲」唔明點解唔等谷草！？

第10場　第二班 (95-75分)　1400米草地

　　「快樂小子」試晒大閘 ，check好走勢始出賽，唔似得上季以短途作首戰，肯安排跑中程，大抵已顯示到對今場的重視程度。「歡呼星」試大閘的追勢不比前駒遜色，始終加咗眼罩之後未甩Ｐ，賽績要尊重。

　　「清風送爽」及「正黃旗」唔係二班留得住，只係地慢冇甚根據。「戰河」打水戰一流，唯一考慮係初出冇大閘，驚未夠開氣程序。