馬主論戰

猪拉多纳

父子兵①攻而破

　　近期柏寶搏殺手風好順，今日我睇好佢繼續有馬贏，最啱心水係第二場「父子兵」，上場初出已響直路賽入位，證明質素唔曳，今次增程跑1200米，排埋個一檔起步，睇怕都係時候開齋。另外鍾意第四場「彩旗飄飄」，上季尾已經開始有似樣走勢，今季初出響1400米都跑第四，增程跑1800米更啱發揮，要吼實。？

張敬山

私家路轉倉即搏

　　剛啱方嘉柏又三W，贏馬真係好似食菜咁易，今日唔吼實佢手馬點得呢？頭場「私家路」就好啱心水，上季搏嚟搏去贏唔到，今季由方嘉柏接手，操練工夫由頭做起，見到同類分子「心路」嘅演出，睇怕呢隻馬亦一樣會盡早交代。另外第六場「聖河」都要留意，上場贏到對手冇得跑，今次居然仲可以跑四班賽，真係着數到暈。

寇鴻萍、梁廷鏘

精算攻略計啱數

　　蔡約翰話晒係上屆冠軍，暫時只贏得一場頭馬，數字實在偏低，估計攻勢好快就嚟，今日就提供呢個倉嘅馬。先吼第九場「精算攻略」，上季初跑沙田即刻擊敗「引伸波幅」贏馬，證明唔係窄場先掂，今次趁有新鮮感縮程跑1400米，隨時掃晒。另外推介尾場「安御」，上季同「天久」鬥到叮噹馬頭分勝負，響二班點都有着數。

任達華